नांदेड: नांदेड शहर व जिल्ह्यात गुन्हेगारी आणि फसवणुकीच्या घटनांमध्ये दिवसेंदिवस मोठी वाढ होत असल्याचे चित्र समोर आले आहे. एकाच वेळी दोन मोठ्या घट
नांदेड: नांदेड शहर व जिल्ह्यात गुन्हेगारी आणि फसवणुकीच्या घटनांमध्ये दिवसेंदिवस मोठी वाढ होत असल्याचे चित्र समोर आले आहे. एकाच वेळी दोन मोठ्या घटनांमुळे जिल्ह्यात खळबळ उडाली असून, एका बाजूला सायबर भामट्यांनी ‘डिजिटल अरेस्ट’च्या नावाखाली एका प्राध्यापकाला तब्बल ५१ लाखांहून अधिक रुपयांचा गंडा घातला आहे, तर दुसरीकडे प्रत्यक्ष रस्त्यावर पोलिसांच्या नावाखाली तोतया पोलिसांनी वृद्धांना लुटले आहे. या दोन्ही घटनांमुळे नागरिकांमध्ये भीतीचे वातावरण पसरले आहे.
पहिली घटना: प्राध्यापकाला ५१ लाख ३३ हजारांचा गंडा
पहिली घटना नवीन नांदेड भागातील जुना कौठा, बसवेश्वर नगर येथे घडली. येथील रहिवासी प्राध्यापक मोहन लक्ष्मणराव गवईवाड यांना १७ जुलै ते २४ जुलै या कालावधीत सायबर भामट्यांनी आपल्या जाळ्यात ओढले. ठगांनी संगनमत करून आपण मुंबईचे पोलीस अधिकारी तसेच वरिष्ठ अधिकारी विश्वास नांगरे पाटील, प्रदीप जयस्वाल, सुजॉय रॉय आणि डाटा प्रोडक्शन बोर्ड मुंबईचे कार्तिक यादव, आर. के. चौधरी यांच्याशी ओळख असल्याचे भासवले. प्राध्यापक गवईवाड यांच्यावर ‘मनी लाँड्रिंग’ आणि ‘टेरर फंडिंग’सारखे अत्यंत गंभीर आरोप लावून त्यांना अटकेची व डिजिटल अरेस्टची थेट भीती दाखवण्यात आली. या मानसिक दबावाखाली प्राध्यापक गवईवाड यांच्याकडून टप्प्याटप्प्याने तब्बल ५१ लाख ३३ हजार ८५६ रुपयांची रक्कम ऑनलाईन उकळण्यात आली. फसवणूक झाल्याचे लक्षात आल्यानंतर त्यांनी नांदेड सायबर सेलकडे तक्रार नोंदवली असून, या हाय-प्रोफाइल गुन्ह्याचा पुढील तपास सायबर सेलचे पोलीस निरीक्षक वसंत सप्रे करत आहेत.
दुसरी घटना: तोतया पोलिसांकडून वृद्धांची लुटमार
दुसरीकडे, नांदेड शहरासह ग्रामीण भागात तोतया पोलीस कमालीचे सक्रिय झाले असून ते प्रामुख्याने ज्येष्ठ नागरिकांना लक्ष्य करत आहेत. २४ जुलै रोजी सिडको येथील एलआयसी ऑफिस परिसर आणि वासरणी ओव्हर ब्रिज येथे दोन अनोळखी इसमांनी ‘आम्ही पोलीस आहोत’ अशी बतावणी केली. रस्ता सुरक्षित नसल्याचे सांगून त्यांनी चंद्रकांत हनुमंतराव नक्कावार आणि प्रदीपसिंग गोविंदसिंग ठाकूर या दोन वृद्धांच्या हातातील सुमारे ६५ हजार रुपये किमतीच्या सोन्याच्या अंगठ्या काढून घेतल्या आणि त्या गुंडाळून देण्याच्या बहाण्याने पोबारा केला. याप्रकरणी नांदेड ग्रामीण पोलीस ठाण्यात गुन्हा दाखल करण्यात आला असून पोलीस हवालदार यालवार या भामट्यांचा शोध घेत आहेत.
वाढत्या सायबर गुन्ह्यांच्या पार्श्वभूमीवर, कोणत्याही अज्ञात फोन कॉलला किंवा अंमलबजावणी यंत्रणेच्या नावाने येणाऱ्या धमक्यांना बळी पडू नये, तसेच रस्त्यावर अनोळखी व्यक्तींनी पोलीस असल्याचे सांगून दागिने काढून ठेवण्यास सांगितल्यास त्यावर विश्वास ठेवू नये, असे आवाहन पोलिसांकडून करण्यात आले आहे.
COMMENTS