‘मन की बात’मधून पंतप्रधान मोदींनी केले नागालँडच्या फुटबॉल उपक्रमाचे कौतुक; जागतिक योगासन स्पर्धेतील भारतीय खेळाडूंचाही गौरव

नवी दिल्ली: ‘मन की बात’च्या १३५ व्या भागात पंतप्रधान नरेंद्र मोदी यांनी नागालँडमध्ये बालकांना फुटबॉलशी जोडण्यासाठी राबविण्यात येत असलेल्या उपक्रमांचे विशेष कौतुक केले आहे. याचबरोबर अहमदाबाद येथे झालेल्या पहिल्या जागतिक योगासन स्पर्धेत भारताने मिळविलेल्या उल्लेखनीय यशाचा गौरवही त्यांनी केला.

जागतिक योगासन स्पर्धेत भारताची ऐतिहासिक कामगिरी; ११४ पदके पटकावली

जून महिन्यात साजऱ्या झालेल्या आंतरराष्ट्रीय योग दिनाला जगभरातून उत्स्फूर्त प्रतिसाद मिळाल्याचे पंतप्रधानांनी सांगितले. भारताच्या पुढाकाराने सुरू झालेल्या या अभियानात जगातील हजारो ठिकाणी योगाभ्यासाचे कार्यक्रम पार पडले आणि देशातील कोट्यवधी नागरिकांनी यात सहभाग घेतला. याच पार्श्वभूमीवर अहमदाबाद येथे पार पडलेल्या जागतिक योगासन स्पर्धेत भारतीय खेळाडूंनी उत्कृष्ट कामगिरी करत एकूण ११४ पदके पटकावली. यामध्ये १०२ सुवर्णपदकांचा समावेश असून पदकतालिकेत भारताने अव्वल स्थान मिळविले आहे. पंतप्रधानांनी या यशाबद्दल सर्व विजेत्या खेळाडूंचे अभिनंदन केले.

‘नागालँड बेबी लीग’चे विशेष कौतुक

पंतप्रधानांनी आपल्या संबोधनात नागालँडमधील ‘नागालँड बेबी लीग’ या अभिनव उपक्रमाचा विशेष उल्लेख केला. ५ ते १२ वर्षे वयोगटातील मुला-मुलींना फुटबॉलकडे आकर्षित करण्यासाठी ही स्पर्धा आयोजित केली जाते. लहान वयातच क्रीडागुणांना प्रोत्साहन देणे, संघभावना विकसित करणे आणि खेळाडूंची ओळख निर्माण करणे हा या उपक्रमाचा मुख्य उद्देश आहे.

देशातील युवकांमध्ये खेळांविषयीची आवड दिवसेंदिवस वाढत असून अनेक तरुण आता खेळाकडे करिअरच्या दृष्टीने पाहू लागले आहेत, असे पंतप्रधान म्हणाले. नागालँडमधील हा उपक्रम त्या सकारात्मक बदलाचे उत्तम उदाहरण आहे. गेल्या तीन वर्षांत या बाल फुटबॉल स्पर्धेने राज्यातील हजारो मुलांना खेळाशी जोडले असून त्यांच्या व्यक्तिमत्त्व विकासावरही सकारात्मक परिणाम झाला आहे. ग्रामीण आणि दुर्गम भागातील बालकांपर्यंत क्रीडासंधी पोहोचविण्याचे महत्त्वपूर्ण कार्य या उपक्रमातून होत असल्याचे पंतप्रधानांनी अधोरेखित केले.