आषाढी वारीनिमित्त मुस्लिम समाजातर्फे वारकर्‍यांना फळासह पाणी वाटप

म्हसवड / वार्ताहर : आषाढी वारीनिमित्त म्हसवड शहरातील मुस्लिम समाजाने दाखवलेल्या सौहार्दाचे एक अनोखे उदाहरण बघायला मिळाले. या वारीच्या प्रसंगी, म्हसवड शहरातील मुस्लिम समाजाने वारकर्‍यांना फळे आणि पाणी वाटप करून त्यांच्या यात्रेला समर्थन दिले.
वरील उपक्रमाचे आयोजन करणारे मुस्लिम समाजाचे प्रतिनिधी सोहेल शोकत मुल्ला म्हणाले, आषाढी वारी ही आपल्या सर्वांच्या एकतेचे प्रतीक आहे. यामध्ये भाग घेऊन आपण सर्व धर्मांच्या श्रध्देचा सन्मान करतो. समाजात शांतता आणि बंधुत्व कायम राखणे आपले कर्तव्य आहे आणि म्हणूनच आम्ही वारकर्‍यांना फळे आणि पाणी वाटप केले.
या उपक्रमादरम्यान, वारकर्‍यांनी देखील मुस्लिम समाजाच्या या आदरभावनेचे मनःपूर्वक स्वागत केले. त्यांनी सांगितले की, ह्या वारीत सामील होण्याचा आनंद आम्हाला मिळाला आणि अशा प्रकारच्या समर्थनामुळे आमची यात्रा अधिक सुखद झाली.
म्हसवड शहरातील विविध समाज घटकांनीही या उपक्रमाचे कौतुक केले. ते म्हणाले की, अशा कृतीमुळे समाजात आपुलकी आणि एकोप्याचे वातावरण निर्माण होते.आषाढी यात्रेनिमित्त मुस्लिम बांधवांनी दिंडी काळात आपली चिकन मटनाची दुकानें बंद ठेवली होती.
आषाढी वारीच्या निमित्ताने दाखवलेल्या या आदरभावनेमुळे म्हसवड शहरातील एकतेची भावना अधिक दृढ झाली आहे. विविध धर्मांच्या लोकांनी एकत्र येऊन साजरा केलेला हा क्षण निश्‍चितच ऐतिहासिक ठरला आहे. या सत्कार्यात म्हसवड शहरातील, असिफभाई मुजावर, नगरसेवक अकीलभाई काझी, पत्रकार अहमद मुल्ला, फिरोजभाई मुल्ला, हाजी शौकतभाई मुल्ला, सलाउद्दीन काझी, सोहेलभाई मुल्ला, आदम मुल्ला, असद मुल्ला, अशरफ मुजावर, अजीम मुुल्ला, मोहसिन तांबोली, हाफिज अशरफ, समीर मुजावार, फारुख नदाफ, वासिम नदाफ, आरिफभाई मुजावर सहभागी झाले होते.
यावेळी म्हसवड पोलीस ठाण्याचे सपोनि सखाराम बिराजदार, गोपनीय विभागाचे अभिजित भादुले व सर्व पोलीस कर्मचार्‍यांनी दिंडी काळात वाहतूकीचे योग्य नियोजन करून शांतता व सुव्यवस्था राखण्याचे काम केले.