खा.सुप्रिया सुळेंनी टोचले पार्थ पवारांचे कान; राष्ट्रवादी पार्थच्या बचावासाठी मैदानात; खा. राहुल गांधींच्या कामगिरीवर प्रश्‍नचिन्ह

मुंबई : बारामती पोटनिवडणुकीच्या पार्श्‍वभूमीवर राज्यातील राजकीय वातावरण तापले असताना राष्ट्रवादी काँग्रेस (शरद पवार गट)च्या खासदार सुप्रिया सुळे यांनी काँग्रेसच्या ऐतिहासिक योगदानाची ठाम बाजू मांडत अप्रत्यक्षपणे पार्थ पवार यांना मर्यादांचे भान राखण्याचा सल्ला दिला आहे. त्याचवेळी राष्ट्रवादीकडून काँग्रेसवर जोरदार पलटवार करत राहुल गांधी यांच्या कामगिरीवर प्रश्‍नचिन्ह उपस्थित करण्यात आले आहे.
सुळे म्हणाल्या की, देशाच्या स्वातंत्र्यापासून ते आजवरच्या लोकशाही व्यवस्थेच्या उभारणीत भारतीय राष्ट्रीय काँग्रेसचे योगदान अत्यंत महत्त्वाचे राहिले आहे. केंद्रापासून ग्रामपंचायतीपर्यंत, तसेच महिला सक्षमीकरण, युद्धातील विजय आणि संविधानिक मूल्ये जपण्यामध्ये काँग्रेसची भूमिका नाकारता येणार नाही. आज आपण जो स्वातंत्र्याचा श्‍वास घेतो, तो काँग्रेसची देण आहे, असे त्यांनी स्पष्टपणे नमूद केले. तसेच, मी आणि अजित पवार दोघेही काँग्रेसच्या राजकीय संस्कारात वाढलो आहोत, असे सांगत त्यांनी आपल्या राजकीय जडणघडणीची पार्श्‍वभूमी अधोरेखित केली. लोकशाहीत प्रत्येकाला मत मांडण्याचा अधिकार असला तरी त्या अभिव्यक्तीत संयम आणि मर्यादा आवश्यक असल्याचे त्यांनी सुचवले. पार्थ पवारांच्या वक्तव्यांवर बोलताना सुळे यांनी कुटुंबातील संवाद सार्वजनिकरित्या मांडू नयेत, असा सूचक इशारा दिला. घरातील मोठ्यांनी काही मत व्यक्त केल्यास त्यावर प्रतिवाद न करणे हीच आमची परंपरा आहे, असे सांगत त्यांनी शरद पवार यांच्या भूमिकेला समर्थन दर्शवले. दरम्यान, राष्ट्रवादी काँग्रेस पक्षनेही काँग्रेसच्या टीकेला प्रत्युत्तर देत आक्रमक भूमिका घेतली आहे. पक्षाचे सरचिटणीस सूरज चव्हाण यांनी काँग्रेसने पार्थ पवारांवर टीका करण्याऐवजी स्वतःच्या नेतृत्वाचे मूल्यमापन करावे, असा टोला लगावला. काँग्रेसने इतरांवर बोट दाखवण्यापूर्वी राहुल गांधींच्या कार्याचा आढावा घ्यावा, असे त्यांनी म्हटले. बारामती पोटनिवडणुकीच्या संदर्भात महाराष्ट्रातील परंपरेचा मुद्दाही पुढे आला आहे. एखाद्या नेत्याच्या निधनानंतर त्याच्या कुटुंबातील सदस्य निवडणूक लढवत असल्यास ती बिनविरोध करण्याची परंपरा असल्याचा दावा करत, काँग्रेसने ही परंपरा मोडल्याचा आरोप राष्ट्रवादीने केला आहे.

बारामती निवडणुकीतील तणाव स्पष्ट
बारामतीची निवडणूक केवळ राजकीयच नव्हे, तर परंपरा विरुद्ध स्पर्धा असा संघर्ष ठरत असल्याचे चित्र आहे. सुळे यांनी महाविकास आघाडी तसेच इतर पक्षांचे आभार मानत राजकारणात वैचारिक मतभेद असले तरी वैयक्तिक दुरावा नसावा, हा यशवंतराव चव्हाण यांचा वारसा महाराष्ट्राने जपल्याचे नमूद केले. एकूणच, बारामती पोटनिवडणुकीच्या निमित्ताने काँग्रेस व राष्ट्रवादी काँग्रेस यांच्यातील तणाव अधिक स्पष्ट होत असून, पुढील काळात ही राजकीय चुरस आणखी तीव्र होण्याची शक्यता व्यक्त केली जात आहे.