मनोज जरांगेे यांचा 29 ऑगस्टपासून आंदोलनाचा इशारा58 लाख पात्र नागरिकांना कुणबी प्रमाणपत्र देण्याची मागणी

मराठा आरक्षणाच्या मागणीवरून मनोज जरांगे पाटील यांनी पुन्हा एकदा राज्य सरकारविरोधात आक्रमक भूमिका घेतली आहे. जालना जिल्ह्यातील अंतरवाली सराटी येथे झालेल्या पत्रकार परिषदेत त्यांनी २९ ऑगस्टपासून निर्णायक आंदोलन सुरू करण्याचा इशारा दिला आहे.मराठा समाजाच्या नोंदींवर आधारित सुमारे ५८ लाख पात्र नागरिकांना तातडीने कुणबी प्रमाणपत्र देण्यात यावे, अशी प्रमुख मागणी जरांगे पाटील यांनी केली आहे. सरकारने २८ ऑगस्टपर्यंत याबाबत ठोस निर्णय घ्यावा, अन्यथा राज्यभर व्यापक जनआंदोलन उभारले जाईल, असा इशारा त्यांनी दिला.मनोज जरांगे पाटील म्हणाले की, मराठा आरक्षणाच्या लढ्याला २९ ऑगस्ट रोजी तीन वर्षे पूर्ण होत आहेत. शासनाने हैदराबाद राजपत्रातील नोंदी मान्य केल्या असतानाही पात्र लाभार्थ्यांना अद्याप कुणबी प्रमाणपत्रांचे वितरण झालेले नाही. त्यामुळे सरकारने कोणताही विलंब न करता पात्र नागरिकांना प्रमाणपत्रे द्यावीत, अशी मागणी त्यांनी केली.मराठा समाजाला जाणीवपूर्वक न्यायापासून दूर ठेवले जात असल्याचा आरोप करत जरांगे पाटील यांनी सरकारच्या धोरणांवर टीका केली. समाजातील तरुणांच्या शिक्षण, नोकरी आणि भविष्यासंदर्भातील प्रश्न गंभीर आहेत. गेल्या तीन वर्षांपासून समाज शांततेच्या मार्गाने लढा देत असून, आता सरकारने निर्णय घेण्याची गरज असल्याचे त्यांनी सांगितले.उपलब्ध वंशावळीच्या नोंदी, स्थानिक चौकशी अहवाल आणि शासनाच्या निर्णयांनंतरही अनेक पात्र व्यक्तींना प्रमाणपत्रासाठी अडचणी येत असल्याचा दावा त्यांनी केला. पात्र मराठा नागरिकांना कुणबी प्रमाणपत्र मिळेपर्यंत आंदोलन मागे घेतले जाणार नाही, अशी ठाम भूमिका त्यांनी मांडली.२९ ऑगस्टपासून सुरू होणारे आंदोलन हे मराठा आरक्षणाच्या लढ्यातील महत्त्वाचे पाऊल ठरेल, असे सांगत त्यांनी समाजबांधवांना मोठ्या संख्येने सहभागी होण्याचे आवाहन केले आहे.तसेच ज्यांच्या वंशावळीच्या नोंदी उपलब्ध आहेत, त्यांनी विलंब न करता कुणबी प्रमाणपत्रासाठी अर्ज करावेत, असेही मनोज जरांगे पाटील यांनी सांगितले. मराठा आरक्षणाचा प्रश्न हा केवळ एका समाजापुरता मर्यादित नसून लाखो कुटुंबांच्या भवितव्याशी संबंधित असल्याचे मत त्यांनी व्यक्त केले.