इराणकडून ट्रम्प यांना जीवे मारण्याची धमकी

तेहरान : इराणमध्ये सुरू असलेल्या सरकारविरोधी आंदोलनांच्या पार्श्‍वभूमीवर अमेरिका आणि इराण यांच्यातील तणाव अधिकच चिघळताना दिसत आहे. अमेरिकेचे माजी राष्ट्राध्यक्ष डोनाल्ड ट्रम्प यांनी इराणविरोधात संभाव्य लष्करी कारवाईचे संकेत दिल्यानंतर, तेहरानकडून अत्यंत आक्रमक प्रतिक्रिया समोर आली आहे. इराणच्या सरकारी दूरचित्रवाणीवर प्रसारित झालेल्या एका वादग्रस्त दृश्यामुळे आंतरराष्ट्रीय पातळीवर खळबळ उडाली आहे.
या फुटेजमध्ये थेट ट्रम्प यांना लक्ष्य करणारी धमकी सूचित होत असल्याचा आरोप केला जात आहे. कार्यक्रमादरम्यान एका तरुणाने हातात धरलेल्या पोस्टरवर ट्रम्प यांच्यावर झालेल्या जुन्या हल्ल्याचे छायाचित्र दाखवण्यात आले असून, फारसी भाषेत यावेळी निशाणा चुकणार नाही असा मजकूर झळकत असल्याचे स्पष्ट दिसते. या दृश्यामुळे दोन्ही देशांतील शाब्दिक संघर्ष अधिक धोकादायक टप्प्यावर पोहोचल्याचे संकेत मिळत आहेत. हे दृश्य तेहरानमध्ये अलीकडेच झालेल्या आंदोलनांदरम्यान मृत्युमुखी पडलेल्या सुरक्षादलाच्या जवानांच्या स्मरणार्थ आयोजित समारंभात दाखवण्यात आले. या कार्यक्रमात सहभागी नागरिकांनी अमेरिका-विरोधी घोषणांचे फलक हातात धरले होते, तर काही जण सर्वोच्च नेते आयातुल्ला अली खामेनेई यांची छायाचित्रे घेऊन उपस्थित होते. या प्रसारणामुळे इराण सरकारच्या भूमिकेवर आंतरराष्ट्रीय पातळीवर प्रश्‍नचिन्ह उपस्थित झाले आहे. उल्लेखनीय बाब म्हणजे, पोस्टरमध्ये दाखवलेला हल्ला 2024 मध्ये अमेरिकेच्या पेनसिल्व्हेनिया राज्यातील बटलर येथे एका निवडणूक प्रचारसभेदरम्यान घडला होता. त्या वेळी थॉमस क्रूक्स नावाच्या बंदूकधार्‍याने ट्रम्प यांच्यावर गोळी झाडली होती. मात्र, गोळी लक्ष्य चुकल्याने ट्रम्प थोडक्यात बचावले होते आणि त्यांच्या कानाला किरकोळ इजा झाली होती. इराणचे नाव यापूर्वीही आंतरराष्ट्रीय पातळीवर हत्या कटांच्या आरोपांशी जोडले गेले आहे. विशेषतः जानेवारी 2020 मध्ये इराणी लष्करातील वरिष्ठ अधिकारी आणि कुद्स फोर्सचे प्रमुख जनरल कासिम सुलेमानी यांच्या अमेरिकेकडून झालेल्या हत्येनंतर, इराणमधील अनेक नेत्यांनी ट्रम्प यांच्याविरोधात तीव्र प्रतिशोधात्मक वक्तव्ये केली होती. त्या पार्श्‍वभूमीवर आता प्रसारित झालेल्या या फुटेजकडे गंभीरतेने पाहिले जात आहे.