मुंबई विमानतळावर दुर्घटना थोडक्यात टळलीएकाच धावपट्टीवर दोन विमाने समोरासमोर

मुंबई : मुंबई विमानतळावर मंगळवारी रात्री अत्यंत गंभीर स्वरूपाची घटना घडली. एकाच धावपट्टीवर दोन प्रवासी विमाने समोरासमोर येण्याची वेळ आल्याने काही क्षण तणावाचे वातावरण निर्माण झाले. मात्र, हवाई वाहतूक नियंत्रण यंत्रणेने वेळेवर दिलेल्या सूचनांनुसार एका विमानाची उड्डाण प्रक्रिया तातडीने थांबविण्यात आल्याने संभाव्य मोठी दुर्घटना टळली.
मिळालेल्या माहितीनुसार, ही घटना मंगळवारी रात्री सुमारे दहा वाजण्याच्या सुमारास घडली. सिलीगुडीहून मुंबईत दाखल झालेले विमान धावपट्टीवर उतरून ती पूर्णपणे रिकामी करण्यापूर्वीच दिल्लीकडे जाणार्‍या दुसर्‍या विमानाला उड्डाणाची परवानगी मिळाल्याची परिस्थिती निर्माण झाली. त्यामुळे काही काळ दोन्ही विमाने एकाच धावपट्टीवर असल्याचे लक्षात येताच हवाई वाहतूक नियंत्रण यंत्रणेने तातडीने हस्तक्षेप केला. सूचना मिळताच दिल्लीकडे रवाना होणार्‍या विमानाच्या वैमानिकाने उड्डाणासाठी सुरू केलेली धाव तत्काळ थांबवली. त्यानंतर विमान सुरक्षितपणे परत उभे करण्यात आले. या जलद निर्णयामुळे मोठा अनर्थ टळल्याचे मानले जात आहे. घटनेनंतर संबंधित विमान कंपनीने निवेदन प्रसिद्ध करून सांगितले की, मुंबईहून दिल्लीकडे जाणार्‍या विमानाच्या वैमानिकांनी हवाई वाहतूक नियंत्रण यंत्रणेच्या आदेशानुसार उड्डाण प्रक्रिया अर्धवट थांबवली. त्यानंतर विमान नियमानुसार तपासणीसाठी परत नेण्यात आले असून, सर्व तांत्रिक बाबींची सखोल पाहणी केली जाणार आहे. तसेच प्रवाशांचा प्रवास विस्कळीत होऊ नये, यासाठी त्यांना शक्य तितक्या लवकर त्यांच्या गंतव्यस्थानी पोहोचविण्याची पर्यायी व्यवस्था करण्यात येत असल्याचेही कंपनीने स्पष्ट केले आहे. विमान उड्डाण करण्यापूर्वी आवश्यक वेग मिळवण्यासाठी धावपट्टीवर वेगाने धावण्याची जी प्रक्रिया असते, तीच उड्डाणाची प्रारंभीची धाव मानली जाते. ही प्रक्रिया योग्य वेळी थांबविल्यामुळे दोन्ही विमानांमधील संभाव्य धडक टळली. या संपूर्ण घटनेनंतर संबंधित यंत्रणांकडून कारणांचा तपशीलवार शोध सुरू करण्यात आला आहे. धावपट्टीवरील समन्वयात नेमकी कुठे त्रुटी राहिली, याचा तपास केला जात असून आवश्यक असल्यास संबंधित प्रक्रियेत सुधारणा करण्याबाबत निर्णय घेतला जाणार आहे.