मान्सूनची वाटचाल मंदावली! देशातील ४० टक्के भागात पावसाची कमतरता; हवामान विभागाची चिंता वाढली

नवी दिल्ली : जून महिन्याचा तिसरा आठवडा सुरू असतानाही नैऋत्य मान्सूनची प्रगती अपेक्षित वेगाने झालेली नाही. देशातील अनेक भागांमध्ये अद्याप मान्सूनचे ढग पोहोचले नसल्याने पावसाची कमतरता जाणवत आहे. हवामान विभागाच्या आकडेवारीनुसार, देशातील सुमारे ४० टक्के भागात सरासरीपेक्षा कमी पाऊस नोंदविण्यात आला आहे.

उपग्रह निरीक्षणानुसार महाराष्ट्र, गुजरात, मध्य प्रदेश, राजस्थान आणि कर्नाटकच्या मोठ्या भागांमध्ये मान्सूनचे ढग अद्याप सक्रिय झालेले नाहीत. त्यामुळे या राज्यांमध्ये पावसाची प्रतीक्षा कायम आहे. देशातील ७२३ जिल्ह्यांपैकी केवळ १०३ जिल्ह्यांमध्येच समाधानकारक पाऊस झाल्याचे दिसून आले आहे.

यंदा मान्सूनने ४ जून रोजी केरळमध्ये प्रवेश केला. त्यानंतर अवघ्या तेरा दिवसांत तो १९ राज्यांपर्यंत पोहोचला. मात्र, गेल्या सात दिवसांपासून त्याची प्रगती तेलंगणातील भद्राचलम परिसरात थांबलेली आहे. परिणामी छत्तीसगड, महाराष्ट्र आणि मध्य प्रदेशातील अनेक भागांमध्ये मान्सूनचा पाऊस उशिराने पोहोचत आहे.

हवामान तज्ज्ञांच्या मते, बंगालच्या उपसागरात अपेक्षित तीव्र कमी दाबाचे क्षेत्र निर्माण न झाल्यामुळे मान्सूनला आवश्यक बळ मिळाले नाही; त्यामुळे त्याच्या पुढील वाटचालीचा वेग मंदावला आहे. मान्सूनचा नियमित पाऊस अद्याप अनेक भागांत पोहोचलेला नसला तरी मान्सूनपूर्व वातावरणीय घडामोडी आणि स्थानिक हवामान प्रणालींमुळे अनेक राज्यांमध्ये पावसाच्या सरी पडत आहेत. यामुळे तापमानात लक्षणीय घट झाली असून उष्णतेच्या लाटेपासून नागरिकांना मोठा दिलासा मिळाला आहे.