चैत्यभूमी दादर येथे विशेष श्रामणेर व बौद्धाचार्य धम्म प्रशिक्षण शिबिराचे आयोजन

डॉ. बाबासाहेब आंबेडकर स्मारक, चैत्यभूमी दादर (पश्चिम), मुंबई येथे विशेष श्रामणेर व बौद्धाचार्य धम्म प्रशिक्षण शिबिराचे आयोजन करण्यात आले असून, हे शिबिर दि. 12 मे ते 21 मे 2026 या कालावधीत संपन्न होणार आहे. बौद्ध धम्माचा सखोल अभ्यास करण्याची इच्छा असलेल्या विविध समाजातील धर्मांतरित बौद्ध बांधवांसाठी हे विशेष शिबिर आयोजित करण्यात आले आहे.
सत्यशोधक ओबीसी परिषद, सत्यशोधक समाज महासंघ, चर्मकार संघ, अखिल भारतीय धम्म महासंघ, प्रजासत्ताक जनता परिषद तसेच इतर विविध माध्यमांतून धर्मांतरित झालेल्या ओबीसी, पूर्वाश्रमीचे मातंग, वाल्मिकी, चर्मकार, ढोर समाजातील बौद्ध बांधवांना या शिबिरात सहभागी होण्याची संधी उपलब्ध करून देण्यात आली आहे. संस्थेचे राष्ट्रीय कार्याध्यक्ष आदरणीय डॉ. भीमराव य. आंबेडकर यांच्या मार्गदर्शनाखाली तसेच संस्थेचे ट्रस्टी व राष्ट्रीय उपाध्यक्ष तथा मुंबई केंद्रीय कार्यालय प्रमुख आद. अ‍ॅड. डॉ. एस. के. भंडारे यांच्या सल्ल्याने या शिबिराचे आयोजन करण्यात आले आहे. महाराष्ट्र राज्य शाखेचे संरक्षण सचिव आयु. अमरसिंह ढाका आणि राज्य संघटक आयु. डी. एस. नरसिंगे यांच्याकडे नावनोंदणी केलेल्या धर्मांतरित बौद्ध बांधवांना या विशेष शिबिरात प्रवेश देण्यात आला आहे. सर्व सहभागी बांधवांचे मंगळवार दि. 12/05/2026 रोजी दुपारी 4.00 वाजता चैत्यभूमी येथे हार्दिक स्वागत करण्यात येणार आहे. शिबिरात सहभागी होणार्‍या बांधवांनी दि. 12 मे रोजी दुपारी 4 वाजता मुंडन करून शुभ्र वस्त्र परिधान करून आवश्यक साहित्यांसह उपस्थित राहावे, असे आवाहन आयोजकांकडून करण्यात आले आहे. या विशेष धम्म प्रशिक्षण शिबिराच्या माध्यमातून बौद्ध धम्माचे तत्त्वज्ञान, आचार-विचार, धम्म प्रचार व सामाजिक प्रबोधन यांचे प्रशिक्षण दिले जाणार असून, समाजामध्ये धम्म कार्य अधिक प्रभावीपणे रुजविण्याचा प्रयत्न करण्यात येणार असल्याची माहिती आयोजकांनी दिली.