नांदेड शहरात रस्त्यावरच कायद्याची धज्जी! ट्रॅफिक पोलिसाची दादागिरी, तरुणाला उघड धमक्या; व्हिडिओ व्हायरल होताच संताप उसळला

नांदेड : नांदेड शहरात कायद्याचे रक्षण करणार्‍यांच्याच वागणुकीने कायद्याची पायमल्ली होत असल्याचा संतापजनक प्रकार उघड झाला आहे. महानगरपालिकेच्या अतिक्रमण हटविण्याच्या कारवाईदरम्यान सोबत असलेल्या पोलीस पथकातील एका ट्रॅफिक पोलिसाने भररस्त्यात एका तरुणाला उघडपणे धमकावल्याचा व्हिडिओ सोशल मीडियावर तुफान व्हायरल झाला असून, या घटनेमुळे पोलीस दलाच्या शिस्तीवर आणि जबाबदारीवर गंभीर प्रश्नचिन्ह निर्माण झाले आहे.
मिळालेल्या माहितीनुसार, संबंधित तरुणाला वाहन थांबवण्याच्या कारणावरून किंवा कागदपत्र तपासणीच्या मुद्द्यावरून अडवण्यात आले. मात्र, कायद्याच्या चौकटीत राहून कारवाई करण्याऐवजी संबंधित पोलीस कर्मचार्‍याने सरळ अरेरावीचा मार्ग स्वीकारत तरुणाशी उद्धट भाषेत हुज्जत घालण्यास सुरुवात केली. व्हिडिओमध्ये स्पष्टपणे दिसते की, पोलीस कर्मचारी त्या तरुणाजवळ जाऊन आक्रमक देहबोलीत बोलत आहे आणि तुला बघून घेतो अशा स्वरूपाच्या धमक्या देत आहे. ही भाषा केवळ अशोभनीयच नाही, तर पोलीस पदाच्या प्रतिष्ठेलाही काळीमा फासणारी आहे. धक्कादायक बाब म्हणजे, तरुण वारंवार आपली बाजू शांततेने मांडण्याचा प्रयत्न करत असताना, पोलीस कर्मचार्‍याने त्याचे म्हणणे ऐकून घेण्याची कोणतीही तयारी दाखवलेली दिसत नाही. उलट, अधिकाराचा गैरवापर करत दडपशाहीची भूमिका घेतल्याचे दृश्य व्हिडिओत स्पष्ट दिसते. या प्रकारामुळे कायद्याचे रक्षकच जर दादागिरी करू  लागले, तर सामान्य नागरिकांनी न्याय कुणाकडे मागायचा? असा संतप्त सवाल आता सर्वसामान्य नागरिकांकडून उपस्थित केला जात आहे. सोशल मीडियावर हा व्हिडिओ वेगाने पसरल्यानंतर नेटकर्‍यांनी संतापाची तीव्र लाट व्यक्त केली आहे. अनेकांनी वरिष्ठ पोलीस अधिकार्‍यांना टॅग करून संबंधित कर्मचार्‍यावर तात्काळ निलंबनाची कारवाई करण्याची मागणी केली आहे. ही केवळ एका व्यक्तीची चूक नसून, संपूर्ण यंत्रणेत वाढत चाललेल्या दादागिरीच्या प्रवृत्तीचे लक्षण आहे, अशा प्रतिक्रिया मोठ्या प्रमाणावर उमटत आहेत. वाहतूक शिस्त राखणे ही पोलिसांची जबाबदारी असली, तरी त्यासाठी कायदेशीर मर्यादा आणि नागरिकांप्रती आदर पाळणे तितकेच आवश्यक आहे. मात्र, नांदेडमधील हा प्रकार पाहता, काही कर्मचार्‍यांना अधिकार म्हणजे मनमानी करण्याचा परवाना मिळाल्याचा गैरसमज झाल्याचे स्पष्ट होते. या घटनेमुळे पोलीस खात्याच्या प्रतिमेला मोठा धक्का बसला असून, जनतेतील विश्वास डळमळीत होण्याची भीती व्यक्त केली जात आहे. दरम्यान, वाढता जनआक्रोश लक्षात घेता वरिष्ठ पोलीस प्रशासनाने या प्रकरणाची गंभीर दखल घेऊन चौकशी सुरू करण्याची शक्यता आहे. संबंधित कर्मचार्‍यावर कठोर विभागीय कारवाई झाली, तरच भविष्यात अशा दादागिरीला आळा बसू शकतो, अन्यथा अशा घटना पुन्हा घडण्याची शक्यता नाकारता येणार नाही.