जपानमध्ये 7.5 तीव्रतेचा भूकंप

टोकियो : जपानमध्ये सोमवारी सकाळी 7.5 तीव्रतेचा जोरदार भूकंप झाला असून, त्यानंतर किनारी भागांसाठी महाभरतीचा इशारा देण्यात आला आहे. या धक्क्यांमुळे अनेक भागांत भीतीचे वातावरण निर्माण झाले आहे. जपानच्या हवामान विभागाने दिलेल्या माहितीनुसार, इवाते प्रांतासह होक्काइडो आणि आओमोरीच्या काही किनारी पट्ट्यांमध्ये सुमारे तीन मीटर उंचीच्या लाटा उसळण्याची शक्यता व्यक्त करण्यात आली आहे. त्यामुळे या भागांतील नागरिकांना सतर्कतेचा इशारा देण्यात आला आहे. प्रशासनाने किनारपट्टी व नदीकाठच्या परिसरातील नागरिकांना तातडीने सुरक्षित, उंच ठिकाणी स्थलांतर करण्याचे आवाहन केले आहे.