दोन जहाजांद्वारे इराणी तेल भारतात‘फेलिसिटी’ आणि ‘जया’जहाजे भारतीय बंदरांत दाखल

नवी दिल्ली : सात वर्षांच्या खंडानंतर भारताने इराणकडून कच्च्या तेलाची आयात पुन्हा सुरू केली असून, इराणी तेलाने भरलेली दोन अतिविशाल जहाजे देशातील बंदरांवर दाखल झाली आहेत. अमेरिकेकडून अलीकडेच दिलेल्या तात्पुरत्या सवलतीचा लाभ घेत देशातील तेल शुद्धीकरण कंपन्यांनी हा निर्णय घेतल्याचे समजते.
मिळालेल्या माहितीनुसार, ‘फेलिसिटी’ नावाचे जहाज पश्‍चिम किनार्‍यावरील सिक्का बंदरात पोहोचले आहे, तर ‘जया’ हे दुसरे जहाज ओडिशा किनार्‍यावरील बंदरावर उभे आहे. या दोन्ही जहाजांमधून मोठ्या प्रमाणावर कच्चे तेल आणण्यात आले आहे. भारत हा जगातील प्रमुख तेल आयातदार देशांपैकी एक असून, मे 2019 नंतर इराणकडून तेल खरेदी पूर्णपणे थांबली होती. त्यामागे अमेरिकेच्या निर्बंधांचा प्रभाव होता. त्या काळात भारतासह अनेक देशांवर इराणकडून तेल खरेदी न करण्याचा दबाव टाकण्यात आला होता. अलीकडेच अमेरिकेने काही अटींसह मर्यादित सवलत दिल्यानंतर भारतातील तेल शुद्धीकरण क्षेत्राने पुन्हा इराणी तेलाकडे वळण्यास सुरुवात केली आहे. देशातील सर्वात मोठ्या सार्वजनिक क्षेत्रातील तेल शुद्धीकरण उपक्रमाने ‘जया’ जहाजावरील तेल खरेदी केल्याचे वृत्त आहे. तसेच, देशातील खाजगी क्षेत्रातील मोठ्या उद्योगसमूहालाही इराणी तेल आयातीसाठी परवानगी देण्यात आल्याचे समजते. विविध ध्वजांखाली नोंद असलेल्या काही जहाजांद्वारे हे तेल आणण्यात येत आहे. विशेष म्हणजे, या जहाजांपैकी अनेक जहाजे दोन दशकांहून अधिक जुनी असून, त्यांच्यावर अमेरिकेचे निर्बंध लागू असल्याची नोंद आहे. या घडामोडीमुळे भारत-इराण व्यापार संबंधांना नव्याने चालना मिळण्याची शक्यता व्यक्त होत आहे. तसेच, जागतिक तेल बाजारातील बदलत्या परिस्थितीत भारताने उचललेले हे पाऊल ऊर्जा सुरक्षेच्या दृष्टीने महत्त्वाचे मानले जात आहे.