श्रेय पारिख बनला स्पेलिंग बी स्पर्धा २०२६ चा चॅम्पियन; भारतीय वंशाच्या मुलाची अमेरिकेत ऐतिहासिक कामगिरी

वाशिंग्टन : अमेरिकेतील कॅलिफोर्निया येथे वास्तव्यास असलेल्या भारतीय वंशाच्या १४ वर्षीय श्रेय पारिख याने प्रतिष्ठित अशा “स्क्रिप्स नॅशनल स्पेलिंग बी २०२६” (Scripps National Spelling Bee) स्पर्धेत विजेतेपद मिळवत उल्लेखनीय यश संपादन केले आहे. अंतिम फेरीत त्याने न्यू जर्सीच्या ईशान गुप्ता याला मागे टाकत हा बहुमान मिळवला. जगभरातील विद्यार्थ्यांसाठी अत्यंत प्रतिष्ठेची मानली जाणारी ही स्पर्धा जिंकून श्रेयने भारतीय समुदायाची मान उंचावली आहे.

स्पर्धेच्या अंतिम टप्प्यात झालेल्या निर्णायक ‘स्पेल-ऑफ’ (Spell-off) फेरीत दोन्ही स्पर्धकांसमोर ९० सेकंदांत शक्य तितक्या अधिक शब्दांची अचूक स्पेलिंग सांगण्याचे आव्हान ठेवण्यात आले होते. या कसोटीच्या फेरीत श्रेयने ३२ शब्दांची अचूक स्पेलिंग सांगत आघाडी घेतली, तर ईशान गुप्ता याने २५ शब्दांची योग्य उत्तरे दिली. या कामगिरीच्या जोरावर श्रेयला विजेता घोषित करण्यात आले.

श्रेय पारिखचा हा यशाचा प्रवास सातत्यपूर्ण प्रयत्नांचे उदाहरण मानला जातो. यापूर्वी २०२२ मध्ये तो स्पर्धेत ८९ व्या स्थानावर राहिला होता. त्यानंतर त्याने आपल्या कामगिरीत सातत्याने सुधारणा केली आणि २०२४ मध्ये तिसरे स्थान मिळवले. अखेर २०२६ मध्ये त्याने सर्वोच्च स्थान पटकावत विजेतेपदाचा मान मिळवला.

बक्षिसांचा वर्षाव: विजेतेपदासह श्रेयला ५० हजार अमेरिकन डॉलरची (USD 50,000) रोख रक्कम, स्क्रिप्स चषक, स्मृतीपदक तसेच विविध संस्थांकडून विशेष पुरस्कार प्रदान करण्यात येणार आहेत. यामध्ये शब्दकोश प्रकाशन संस्थेकडून आर्थिक पारितोषिक, विमान प्रवासासाठी विशेष सवलत आणि संदर्भ ग्रंथांचा संच यांचाही समावेश आहे.

तीन दिवस चाललेल्या या स्पर्धेचे आयोजन वॉशिंग्टन येथील डीआरए कॉन्स्टिट्यूशन हॉलमध्ये करण्यात आले होते. यंदा अमेरिकेतील सर्व ५० राज्यांसह विविध प्रदेश आणि इतर पाच देशांमधील एकूण २४७ विद्यार्थ्यांनी यात सहभाग नोंदवला होता. अंतिम फेरीसाठी नऊ स्पर्धकांची निवड झाली होती. जॉर्जिया राज्यातील १२ वर्षीय सर्व धारवा याने तिसरे स्थान मिळवले.

“स्क्रिप्स नॅशनल स्पेलिंग बी” ही जगातील सर्वाधिक प्रतिष्ठित शब्दलेखन स्पर्धांपैकी एक मानली जाते. या स्पर्धेत आठवीपर्यंत शिक्षण घेणारे आणि १५ वर्षांखालील विद्यार्थी सहभागी होऊ शकतात. श्रेय पारिखच्या या यशामुळे भारतीय वंशाच्या विद्यार्थ्यांनी आंतरराष्ट्रीय स्तरावर पुन्हा एकदा आपली बौद्धिक क्षमता सिद्ध केल्याची भावना व्यक्त होत असून त्याच्यावर अभिनंदनाचा वर्षाव होत आहे.