इराणमधील भारतीयांना प्रवास टाळण्याचे आवाहन

नवी दिल्ली : इराणमध्ये वाढत असलेल्या संघर्षजन्य परिस्थितीच्या पार्श्‍वभूमीवर भारताच्या दूतावासाने तेथील भारतीय नागरिकांसाठी सुधारित प्रवास सूचना जाहीर केली आहे. सध्याच्या परिस्थितीत भारतीयांनी इराणचा प्रवास टाळावा, तसेच तेथे वास्तव्यास असलेल्या नागरिकांनी उपलब्ध विमानसेवेचा वापर करून आवश्यक असल्यास तात्पुरत्या स्वरूपात सुरक्षित ठिकाणी जाण्याचा विचार करावा, असे आवाहन दूतावासाने केले आहे.
दूतावासाने जारी केलेल्या सूचनेनुसार, सुरक्षा परिस्थिती पूर्ववत होईपर्यंत इराणला जाण्याचे नियोजन पुढे ढकलावे. सध्या इराणमध्ये असलेल्या भारतीयांनी स्वतःच्या सुरक्षिततेला सर्वोच्च प्राधान्य देत परिस्थितीचा सातत्याने आढावा घ्यावा, असेही स्पष्ट करण्यात आले आहे. ज्या भारतीयांनी इराणमध्येच राहण्याचा निर्णय घेतला आहे, त्यांनी अत्यंत सावधगिरी बाळगावी. स्थानिक प्रशासनाकडून वेळोवेळी दिल्या जाणार्‍या सूचनांचे काटेकोर पालन करावे आणि सुरक्षा परिस्थितीतील बदलांवर सतत लक्ष ठेवावे, असे दूतावासाने नमूद केले आहे. प्रवास सूचनेत दक्षिणेकडील किनारी भागांसह लष्करी हालचाली अधिक असलेल्या संवेदनशील परिसरांपासून दूर राहण्याचा सल्ला देण्यात आला आहे. तसेच, इराणमध्ये वास्तव्यास असून अद्याप भारतीय दूतावासाकडे नोंदणी न केलेल्या नागरिकांनी तातडीने नोंदणी करून दूतावासाकडून प्रसिद्ध होणार्‍या अधिकृत माहितीकडे नियमित लक्ष ठेवावे, असेही आवाहन करण्यात आले आहे. इराण आणि अमेरिका यांच्यातील तणाव पुन्हा वाढल्याने मध्य पूर्वेतील परिस्थिती अधिक संवेदनशील बनली आहे. दोन्ही देशांकडून परस्परांविरोधात लष्करी कारवाया झाल्याचे दावे करण्यात येत आहेत. अमेरिकन सैन्याने इराणविरोधातील हवाई मोहिम सुरू ठेवली असल्याचे वृत्त आहे. दुसरीकडे, इराणचे उपपरराष्ट्रमंत्री काझेम गरीबाबादी यांनी अमेरिकेवर पूर्वीच्या आश्‍वासनांचे उल्लंघन केल्याचा आरोप केला असून, त्यानंतर इराणने शांतता सामंजस्याशी संबंधित काही जबाबदार्‍यांच्या अंमलबजावणीला स्थगिती दिल्याचे जाहीर केले आहे. अमेरिकेच्या मध्यवर्ती लष्करी नेतृत्वाच्या माहितीनुसार, मध्य पूर्वेत तैनात असलेले पन्नास हजारांहून अधिक अमेरिकन सैनिक उच्च सतर्कतेवर असून, परिसरातील सुरक्षा परिस्थितीवर बारकाईने लक्ष ठेवले जात आहे.