राष्ट्रवादी काँग्रेस (शरदचंद्र पवार) पक्षाच्या नवनिर्वाचित पदाधिकार्‍यांचा परळीत सत्कार; अमित घाडगे पाटील यांच्या कार्यालयात सोहळा

परळी वैनाथ (प्रतिनिधी) : राष्ट्रवादी काँग्रेस पक्ष (शरदचंद्र पवार) यांच्या विविध पदांवर नुकत्याच निवड झालेल्या नवनिर्वाचित पदाधिकार्‍यांचा भव्य सत्कार समारंभ युवा नेते अमित घाडगे पाटील यांच्या जनसंपर्क कार्यालयात उत्साहपूर्ण वातावरणात पार पडला. यावेळी सर्व नवनिर्वाचित पदाधिकार्‍यांचे पुष्पगुच्छ, शाल आणि श्रीफळ देऊन जाहीर अभिनंदन करण्यात आले.

सत्कार करण्यात आलेल्या मान्यवरांमध्ये प्रामुख्याने नवनिर्वाचित कार्याध्यक्ष बद्रुद्दीन शेख, सचिव अमर रोडे तसेच संघटक सद्दाम हुसेन यांचा समावेश होता. या प्रसंगी पक्षाचे तालुकाध्यक्ष बाबा शिंदे, शहराध्यक्ष महादेव गंगणे, परळी नगर परिषदेचे गटनेते नितीन बागवले, नगरसेवक कादर कुरेशी, युवक शहराध्यक्ष सय्यद फिरोज, श्रीनिवास राऊत यांच्यासह पक्षाचे इतर प्रमुख पदाधिकारी उपस्थित होते.

यावेळी उपस्थित ज्येष्ठ नेत्यांनी आणि मान्यवरांनी नवनिर्वाचित पदाधिकार्‍यांना भावी वाटचालीस शुभेच्छा दिल्या. तसेच पक्ष संघटना अधिक मजबूत करण्यासाठी आणि आगामी निवडणुकांच्या पार्श्वभूमीवर सर्वांनी एकजुटीने कार्य करण्याचे आवाहन केले.

आगामी काळात राष्ट्रवादी काँग्रेस पक्षाची (शरद पवार गट) विचारधारा आणि ध्येयधोरणे तळागाळापर्यंत पोहोचवून सर्वसामान्यांच्या, शेतकऱ्यांच्या आणि तरुणांच्या प्रश्नांसाठी प्रभावीपणे लढा देण्याचा निर्धार सर्व नवनिर्वाचित पदाधिकार्‍यांनी या प्रसंगी व्यक्त केला. या कार्यक्रमात पक्षाच्या संघटनात्मक बांधणीसह परळी आणि बीड जिल्ह्यातील आगामी राजकीय घडामोडींवर सविस्तर चर्चा करण्यात आली. या सत्कार समारंभामुळे स्थानिक कार्यकर्त्यांमध्ये एक नवे नवचैतन्य निर्माण झाले असून पक्ष बळकटीसाठी सर्वांनी एकत्रितपणे काम करण्याचा संकल्प केला आहे.