मुंबई विमानतळावर साडेदहा कोटींचे कोकेन जप्तपरदेशी महिला प्रवासी अटकेत

मुंबई : अंमली पदार्थांच्या आंतरराष्ट्रीय तस्करीविरोधात महसूल गुप्तचर संचालनालयाच्या मुंबई विभागाने मोठी कारवाई करत छत्रपती शिवाजी महाराज आंतरराष्ट्रीय विमानतळावर एका महिला प्रवाशाकडून तब्बल 2.128 किलोग्रॅम कोकेन जप्त केले. जप्त करण्यात आलेल्या या अंमली पदार्थाची आंतरराष्ट्रीय बाजारातील किंमत सुमारे 10 कोटी 65 लाख रुपये असल्याचा अंदाज आहे. या प्रकरणी संबंधित महिलेला ताब्यात घेण्यात आले असून, तिच्या माध्यमातून कार्यरत असलेल्या तस्करीच्या संपूर्ण साखळीचा शोध घेण्यासाठी सखोल तपास सुरू करण्यात आला आहे.
अधिकार्‍यांना मिळालेल्या गोपनीय माहितीनुसार, पश्‍चिम आफ्रिकेतील फ्रीटाउन येथून नैरोबीमार्गे मुंबईत आलेल्या एका महिला प्रवाशावर संशय व्यक्त करण्यात आला होता. त्यानुसार विमानतळावर तिची कसून चौकशी करण्यात आली. त्यानंतर तिच्या सामानाची किरण तपासणी यंत्राद्वारे तपासणी करण्यात आली असता, ट्रॉली पिशव्यांच्या धातूच्या दांड्यांमध्ये संशयास्पद हालचाल आढळून आली. यानंतर अधिकार्‍यांनी पिशव्यांचे धातूचे दांडे वेगळे करून तपासणी केली असता त्यामध्ये अत्यंत कौशल्याने लपवून ठेवलेली दंडगोलाकार आकाराची 17 पाकिटे सापडली. या पाकिटांमध्ये पांढर्‍या रंगाची पावडर भरलेली होती. प्राथमिक रासायनिक चाचणीत हा पदार्थ कोकेन असल्याचे स्पष्ट झाले. त्यानंतर वजन करण्यात आले असता एकूण 2,128 ग्रॅम निव्वळ कोकेन जप्त करण्यात आले. महसूल गुप्तचर संचालनालयाने ही कारवाई अंमली पदार्थ आणि मनोव्यापारिक औषधे प्रतिबंधक कायदा, 1985 अंतर्गत केली आहे. जप्त केलेला अंमली पदार्थ ताब्यात घेऊन पुढील कायदेशीर प्रक्रिया सुरू करण्यात आली आहे. या तस्करीमागे कार्यरत असलेल्या देशांतर्गत व आंतरराष्ट्रीय जाळ्याचा शोध घेण्यासाठी तपास अधिक तीव्र करण्यात आला आहे. या महिलेचे इतर तस्करांशी असलेले संबंध, अंमली पदार्थांचा अंतिम ठिकाणा, तसेच या रॅकेटमध्ये सहभागी असलेल्या इतर व्यक्तींचा शोध तपास यंत्रणा घेत आहे. महसूल गुप्तचर संचालनालयाने स्पष्ट केले की, देशात अंमली पदार्थांची तस्करी रोखणे, आंतरराष्ट्रीय तस्करांच्या साखळ्या उद्ध्वस्त करणे आणि युवकांना अमली पदार्थांच्या विळख्यातून दूर ठेवणे, हे संस्थेचे प्रमुख उद्दिष्ट आहे. त्यासाठी देशातील विमानतळे, बंदरे आणि इतर प्रवेशमार्गांवर सातत्याने विशेष लक्ष ठेवण्यात येत असून, संशयास्पद हालचालींवर त्वरित कारवाई केली जात आहे.