भाजपची निवडणुका जिंकण्याची पद्धत फसवणुकीचीराज ठाकरे : मोहन भागवतांच्या विद्यार्थी संवादावरही टीका

मुंबई : महाराष्ट्र नवनिर्माण सेनेचे अध्यक्ष राज ठाकरे यांनी नाशिक दौर्‍याच्या दुसर्‍या दिवशी घेतलेल्या पत्रकार परिषदेत राज्य आणि केंद्र सरकारच्या विविध धोरणांवर टीका केली. शहरांची होत असलेली दुर्दशा, वैद्यकीय प्रवेश परीक्षेतील गैरव्यवहार, विद्यार्थ्यांचे आंदोलन, आगामी कुंभमेळ्याची तयारी तसेच राष्ट्रीय स्वयंसेवक संघाचे सरसंघचालक मोहन भागवत यांच्या विद्यार्थी संवादावर त्यांनी भाष्य केले. निवडणुका जिंकण्यासाठी भाजप फसवणुकीची पद्धत अवलंबत असल्याचा आरोपही त्यांनी शुक्रवारी केला.
नाशिकमधील रस्त्यांची दुरवस्था आणि शहरातील खड्ड्यांच्या समस्येवर बोलताना राज ठाकरे म्हणाले की, 2015 मधील कुंभमेळ्यानंतर शहरात नेमकी कोणती विकासकामे झाली, याचे उत्तर नागरिकांना मिळालेले नाही. आज अनेक रस्ते खड्ड्यांनी व्यापले असून त्यामुळे अपघात आणि जीवितहानीच्या घटना घडत आहेत. आगामी कुंभमेळ्यासाठी बाहेरील राज्यांतील कंत्राटदारांना कामे दिली जात असल्याची माहिती मिळत असल्याचे त्यांनी सांगितले. तथाकथित आधुनिक शहरांच्या संकल्पनेच्या नावाखाली शहरांचे नियोजन विस्कळीत झाले असून मोठ्या प्रमाणावर वृक्षतोड होत असल्याचा आरोपही त्यांनी केला. विद्यार्थ्यांनी राजधानीत केलेल्या आंदोलनाचा उल्लेख करताना ठाकरे म्हणाले की, हा संताप केवळ विद्यार्थ्यांचा नसून त्यांच्या पालकांचाही आहे. योग्य मागण्यांकडे दुर्लक्ष झाल्यास अशा प्रकारच्या आंदोलनांची तीव्रता वाढू शकते. आंदोलनादरम्यान विद्यार्थ्यांवर करण्यात आलेल्या लाठीमारामुळे समाजात असंतोष वाढल्याचे त्यांनी नमूद केले. तसेच परीक्षांतील प्रश्‍नपत्रिका फुटण्याच्या घटनांकडे सरकारने गांभीर्याने पाहण्याची आवश्यकता असल्याचेही त्यांनी सांगितले. शिक्षण क्षेत्रातील वाढत्या खर्चावर भाष्य करताना राज ठाकरे म्हणाले की, अनेक विद्यार्थी महाविद्यालयापेक्षा खासगी शिकवणी संस्थांवर अधिक अवलंबून आहेत. महाविद्यालयांची शुल्के तुलनेने कमी असताना शिकवणींसाठी लाखो रुपये खर्च करावे लागत असल्याची परिस्थिती निर्माण झाली आहे. सर्व शिकवणी संस्था चुकीच्या नाहीत; मात्र काही ठिकाणी शिक्षणाचे व्यापारीकरण झाल्याचे त्यांनी म्हटले. वैद्यकीय प्रवेश परीक्षेतील प्रश्‍नपत्रिका फुटल्याच्या प्रकरणांची सखोल चौकशी करून दोषींवर कठोर कारवाई करावी, अशी मागणीही त्यांनी केली. नाशिकमधील विद्यार्थी यश गोसावी यांच्या मृत्यूचा उल्लेख करत त्यांनी या प्रकरणात न्याय मिळावा, अशी अपेक्षा व्यक्त केली आणि सरकारने या विषयाकडे संवेदनशीलतेने पाहावे, असे सांगितले.
चीनच्या परीक्षा व्यवस्थेचा दाखला
चीनमधील परीक्षा व्यवस्थेचा संदर्भ देत ठाकरे म्हणाले की, तेथे प्रश्‍नपत्रिका तयार करणार्‍या शिक्षकांसाठी अत्यंत कडक सुरक्षा व्यवस्था असते आणि संपूर्ण यंत्रणा परीक्षेच्या पारदर्शकतेसाठी कार्यरत असते. भारतात मात्र परीक्षा प्रक्रियेतील गैरव्यवहार वारंवार समोर येत असल्याबद्दल त्यांनी चिंता व्यक्त केली. तसेच शिक्षण क्षेत्रातील धोरणांवर सरकारने अधिक जबाबदारीने काम करण्याची गरज असल्याचे त्यांनी सांगितले.