आनंदाचा शिध्याचं अखेर ठरलं ; जिल्ह्यातील सात लाख ८२ हजार कुटुंबांना मिळणार लाभ

नाशिक प्रतिनिधी  – दिवाळी पाठोपाठ गुढीपाडवा आणि डॉ. बाबासाहेब आंबेडकर जयंतीदेखील अधिक गोड व्हावी, याकरिता आनंदाचा शिधा वितरीत करण्याचा निर्णय राज्य सरकारने घेतला आहे. जिल्ह्यासाठी ७ लाख ८२ हजार ५६२ कुटुंबांना शिध्याचे कीट वितरीत करण्यास राज्य सरकारने मान्यता दिली आहे. हे कीट लवकर मिळावेत, अशी मागणी नाशिक जिल्हा रास्तभाव संघटनेने केली आहे

मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या सरकारने दिवाळीत आनंदाचा शिधा वितरीत करण्याचा निर्णय पहिल्यांदा घेतला. सणानिमित्त गोरगरीब कुटुंबांचे तोंड गोड करण्यासाठी १०० रुपयांत एक लिटर पामतेलासह प्रत्येकी एक किलो रवा, साखर आणि चनाडाळ वितरीत करण्यात आली. आतादेखील गुढीपाडवा आणि डॉ. बाबासाहेब आंबेडकर यांच्या जयंतीचे औचित्य साधून पुन्हा आनंदाचा शिधा वाटप करण्याचा निर्णय राज्य सरकारने घेतला आहे. यासाठी संबंधित जिल्ह्यांच्या पुरवठा विभागाकडून मागणीदेखील नोंदविण्यात आली होती.

दिवाळीत हे कीट्स उशिरा प्राप्त झाल्यामुळे ग्राहकांना त्याचे वाटपही उशिरा करावे लागले. त्यामुळे रेशन दुकानदारांना नागरिकांच्या रोषाचा सामना करावा लागला. यंदा तरी रेशन दुकानदारांना हे कीट्स लवकर मिळावेत, अशी आमची मागणी आहे.-

चार दिवसांत शिधा कसा मिळणार ? – गुढीपाडव्याला नागरिकांचे तोंड गोड करण्यासाठी आनंदाचा शिधा वितरीत करण्याचा निर्णय घेण्यात आला. २२ मार्च रोजी गुढीपाडवा असून, तो चार दिवसांवर आला आहे. अजून शिध्याचे कीटस् जिल्ह्याला प्राप्त झालेले नाहीत. त्यातच पुरवठा विभागाचे कर्मचारीही बेमुदत संपामध्ये सहभागी आहेत. अशा परिस्थितीत गुढीपाडव्यापर्यंत हा शिधा पात्र लाभार्थींना मिळण्याची शक्यता कमीच आहे. त्यामुळे डॉ. बाबासाहेब आंबेडकर जयंतीनिमित्तच पात्र लाभार्थींना हा शिधा मिळण्याची शक्यता आहे.