जळगाव दूध संघ निवडणुकीत खडसेंना धक्का, भाजप-शिंदे गटाचे वर्चस्व

जळगाव प्रतिनिधी – जळगाव जिल्ह्याचे राजकारण सध्या  खडसे आणि महाजन या दोन गटाभोवती फिरतांना दिसून येत आहे. खडसे यांच्यासोबत महाविकास आघाडीचे घटकपक्ष असल्यामुळे त्यांच्याकडून शिंदे गट आणि भाजप गटाला मात देणे सोपे जात होते. मात्र जळगाव दूध संघाच्या निवडणुकीत खडसे यांना धक्का बसला आहे.

जळगाव जिल्हा दूध संघाच्या निवडणुकीत एकूण 20 पैकी 16 जागांवर भाजप-शिंदे गटाचे उमेदवार विजयी झाले आहेत. यामध्ये दूध संघाच्या मावळत्या अध्यक्षा मंदाकिनी खडसे यांचा पराभव झाला असून, भाजप आमदार मंगेश चव्हाण यांनी बाजी मारली आहे. परिणामी राष्ट्रवादीचे नेते एकनाथ खडसेंना पराभवाचा धक्का बसला आहे. जळगाव दूध संघावर आतापर्यंत खडसेंचे वर्चस्व होते. मात्र यंदा खडसे यांच्या पत्नी मंदा खडसे यांच्या गटाला म्हणजे महाविकास आघाडीला केवळ चार जागा मिळाल्या आहेत. निकालानंतर मतमोजणी केंद्राच्या बाहेर भाजप-शिंदे गटाच्या कार्यकर्त्यांकडून विजयाचा जोरदार जल्लोष केला जात आहे. या निवडणुकीत त्यांच्या पॅनेलचा पराभव मान्य असल्याची प्रतिक्रिया दिली. विरोधकांनी खोक्याची ताकद लावली आहे. त्यापर्यंत आम्ही गेलो नाही. आर्थिक बळावर विरोधकांनी ही निवडणूक जिंकल्याचा आरोप त्यांनी केला आहे. दूध संघ ताब्यात घेण्यासाठी एकनाथ खडसे आणि मंत्री गिरीश महाजन यांच्यात रस्सीखेच होती. या दोन्ही नेत्यांमध्ये मंत्री गुलाबराव पाटील यांच्यासह सात आमदार हे खडसे यांच्या विरोधात उभे ठाकले असल्याने खडसे हे एकटे पडल्याचे चित्र पाहायला मिळाले होते. राज्यात सत्तांतर झाल्यानंतर जिल्हा दूध संघावर प्रशासक मंडळाची नियुक्ती झाली. यात आमदार मंगेश चव्हाण यांच्याकडे मुख्य प्रशासकपदाची धुरा आली. या निर्णयाच्या विरोधात खडसे गट न्यायालयात गेले. तेथे या निर्णयाला स्थगिती मिळाली. तथापि, त्यांना प्रशासकपदासाठी 32 दिवसांचा कालावधी मिळाला. या काळात त्यांनी दूध संघातील अपहाराचे प्रकरण शोधून काढत गुन्हा दाखल केला. यानंतर दूध संघाची निवडणूक लागल्यानंतर त्यांनी आपण खडसे कुटुंबातील सदस्याच्या विरोधात निवडणूक लढविणार असल्याची घोषणा केली. यानंतर त्यांनी थेट मुक्ताईनगर सोसायटी मतदारसंघातून मावळत्या अध्यक्षा मंदाकिनी खडसे यांच्या विरोधात अर्ज दाखल केला होता.