पाकव्याप्त काश्मीरमध्ये विधानसभा निवडणुकीच्या वेळी तुफान हिंसाचार; गोळीबार आणि जाळपोळीत ९ जणांचा मृत्यू

इस्लामाबाद: पाकिस्तानातील ताब्यातील काश्मीरमध्ये (PoK) विधानसभेच्या निवडणुकीच्या पहिल्या टप्प्यादरम्यान मोठ्या प्रमाणावर हिंसाचार आणि गोळीबाराच्या घटना घडल्या आहेत. बहुतेक मतदान केंद्रांवर दिवसभर तणावाची परिस्थिती पाहायला मिळाली असून, काही ठिकाणी बॅलेट बॉक्स देखील जाळण्यात आले आहेत. या हिंसक घटनांमुळे संपूर्ण निवडणूक प्रक्रियेवरच मोठे प्रश्नचिन्ह उपस्थित केले जात आहे. मीडिया रिपोर्ट्सनुसार, पोलिसांनी केलेल्या गोळीबारात आणि हिंसक चकमकीत तब्बल ९ जणांचा मृत्यू झाला आहे.

मिळालेल्या माहितीनुसार, निवडणुकीच्या पहिल्या टप्प्यात मीरपूर विभागातील १३ मतदारसंघांमध्ये मतदानाची प्रक्रिया पार पडली. सकाळी मतदानाला सुरुवात झाली खरी, परंतु दिवस अखेर अनेक ठिकाणी हिंसाचाराच्या घटना घडल्या. कोटली जिल्ह्यात दोन विरोधी राजकीय पक्षांच्या कार्यकर्त्यांमध्ये थेट गोळीबार झाला. या गोळीबारात पाकिस्तान पीपल्स पार्टीचा (PPP) एक कार्यकर्ता मारला गेला, ज्यानंतर संपूर्ण जिल्ह्यात एकच खळबळ उडाली.

बॅलेट बॉक्स जाळले; मतदारांना धमकावल्याचे आरोप

भिंबर आणि कोटलीसह अनेक संवेदनशील भागांमध्ये उपद्रवी घटकांकडून बॅलेट बॉक्स जाळण्यात आल्याच्या धक्कादायक घटना समोर आल्या आहेत. याशिवाय मतदान प्रक्रियेत मोठ्या प्रमाणावर अडथळा आणल्याचे आरोपही करण्यात आले. परिस्थिती हाताबाहेर गेल्यानंतर अनेक केंद्रांवर मतदान काही काळासाठी थांबवण्यात आले होते. मतदानादरम्यान प्रमुख राजकीय पक्षांच्या नेत्यांनी एकमेकांवर मतदारांना धमकावल्याचे गंभीर आरोप केले.

पीपीपी कार्यकर्त्याचा मृत्यू; राजकीय वातावरण तापले

कोटली जिल्ह्यातील हिंसाचारात मारल्या गेलेल्या कार्यकर्त्याचे नाव मुख्तार यूनूस असल्याचे पाकिस्तान पीपल्स पार्टीने स्पष्ट केले आहे. पक्षाने या हत्येला थेट राजकीय विरोधकांना जबाबदार धरले आहे, तर विरोधी पक्षांनी हे सर्व आरोप फेटाळून लावले आहेत. या संदर्भात पाकिस्तान पीपल्स पार्टीने निवडणूक आयोगाकडे अधिकृत तक्रार दाखल केली आहे. तसेच मीरपूरमध्ये शस्त्रधारी लोकांनी मतदान प्रक्रियेत घुसून हस्तक्षेप केल्याचा गंभीर आरोपही पीपीपीने केला आहे.

या संपूर्ण घटनेमुळे स्थानिक नागरिकांच्या संघटनांनी तीव्र चिंता व्यक्त केली असून, सुरक्षा व्यवस्थेचा बोजवारा उडाल्याने निवडणूक आयोगाच्या भूमिकेवर तीव्र प्रश्न उपस्थित केले जात आहेत.