ट्रम्प यांच्या दौऱ्यानंतर पुतीनही चीनला जाणार

मॉस्को : अमेरिकेचे राष्ट्राध्यक्ष डोनाल्ड ट्रम्प यांच्या चीन दौऱ्यानंतर अवघ्या चोवीस तासांत रशियाचे राष्ट्राध्यक्ष व्लादिमीर पुतीन (Vladimir Putin) यांच्या दोन दिवसीय चीन भेटीची घोषणा करण्यात आली आहे. चीनचे राष्ट्राध्यक्ष शी जिनपिंग यांच्या निमंत्रणावरून पुतीन १९ आणि २० मे रोजी चीन दौऱ्यावर जाणार असल्याची माहिती चीनच्या परराष्ट्र मंत्रालयाने दिली आहे.

रशियाच्या क्रेमलिन प्रशासनानेही या दौऱ्याची अधिकृत पुष्टी केली असून, या भेटीदरम्यान दोन्ही देशांच्या नेत्यांमध्ये जागतिक राजकारण, सुरक्षा आणि आर्थिक सहकार्य यांसारख्या विविध विषयांवर सविस्तर चर्चा होणार आहे. अमेरिका-इराण तणाव, युक्रेनमधील युद्धस्थिती आणि तैवान प्रश्नामुळे निर्माण झालेल्या आंतरराष्ट्रीय अस्थिरतेच्या पार्श्वभूमीवर ही बैठक अत्यंत महत्त्वाची मानली जात आहे.

क्रेमलिनच्या निवेदनानुसार, चीन आणि रशिया यांच्यात २००१ साली झालेल्या मैत्री व सहकार्य कराराच्या पंचविसाव्या वर्षानिमित्त हा दौरा आयोजित करण्यात आला आहे. या बैठकीत दोन्ही देशांतील व्यापक धोरणात्मक (सामरिक) भागीदारी अधिक मजबूत करण्यासाठी आवश्यक उपायांवर चर्चा होईल. ऊर्जा क्षेत्रातील सहकार्य, व्यापारवृद्धी, आशिया-प्रशांत भागातील परिस्थिती तसेच पाश्चात्य देशांसोबत वाढत चाललेला तणाव यावरही दोन्ही नेत्यांमध्ये विचारविनिमय अपेक्षित आहे. चर्चेनंतर संयुक्त घोषणापत्रावर स्वाक्षऱ्या होण्याची शक्यता व्यक्त करण्यात येत आहे.

दौऱ्यात पुतीन चीनचे पंतप्रधान ली कछ्यांग यांचीही भेट घेणार असल्याचे सांगण्यात आले. या चर्चेत व्यापार, गुंतवणूक आणि आर्थिक सहकार्य वाढविण्यावर विशेष भर दिला जाणार आहे. पाश्चात्य निर्बंधांनंतर चीन हा रशियासाठी महत्त्वाचा आर्थिक भागीदार ठरला आहे. विशेषतः तेल आणि नैसर्गिक वायू खरेदीत चीनने मोठी भूमिका घेतल्यामुळे रशियाला आर्थिक दिलासा मिळत असल्याचे मानले जाते. त्यामुळे या दौऱ्याकडे जागतिक राजकारणात नवे समीकरण निर्माण करणारी घडामोड म्हणून पाहिले जात आहे