पुण्यात सलूनमध्ये थरारक गोळीबार; वारजे हादरले;दोन जखमी, आरोपी ताब्यात; पोलिसांकडून तपास वेगात

पुणे : शहरातील कायदा-सुव्यवस्थेवर पुन्हा एकदा प्रश्‍नचिन्ह निर्माण करणारी धक्कादायक घटना वारजे परिसरात घडली. वर्दळीच्या भागातील एका सलूनमध्ये घुसून काही अज्ञात तरुणांनी बेछूट गोळीबार केला. या अचानक झालेल्या हल्ल्यामुळे परिसरात भीतीचे वातावरण पसरले असून नागरिकांमध्ये प्रचंड घबराट निर्माण झाली.
प्राथमिक माहितीनुसार, तीन ते चार तरुण अचानक सलूनमध्ये दाखल झाले आणि कोणतीही पूर्वसूचना न देता त्यांनी गोळ्या झाडण्यास सुरुवात केली. या हल्ल्यात दोन जण जखमी झाले असून त्यांना तातडीने रुग्णालयात दाखल करण्यात आले आहे. सुदैवाने जखमींची प्रकृती स्थिर असल्याची माहिती वैद्यकीय सूत्रांकडून मिळाली आहे. घटनेची माहिती मिळताच पोलिसांनी तातडीने घटनास्थळी धाव घेतली. परिसराची नाकाबंदी करून तपास सुरू करण्यात आला. या प्रकरणात एका संशयित तरुणाला ताब्यात घेण्यात आले असून त्याची सखोल चौकशी सुरू आहे. हल्ल्यात वापरण्यात आलेले शस्त्रही पोलिसांनी जप्त केले आहे.

कायदा-सुव्यवस्थेचा प्रश्‍न ऐरणीवर
या घटनेनंतर शहरातील सुरक्षेच्या प्रश्‍नावर नागरिकांमध्ये तीव्र नाराजी व्यक्त होत आहे. दिवसाढवळ्या अशा प्रकारे गोळीबार होणे ही चिंताजनक बाब असल्याची भावना व्यक्त केली जात आहे. पोलिसांनी दोषींवर कठोर कारवाई करून अशा घटनांना आळा घालावा, अशी मागणी जोर धरत आहे. दरम्यान, या प्रकरणाचा सखोल तपास सुरू असून पुढील काही दिवसांत या गोळीबारामागील नेमके कारण समोर येण्याची शक्यता व्यक्त केली जात आहे.