अमेरिकेकडून इराणी मालवाहू जहाज जप्त

तेहरान : ओमान सागर परिसरातील वाढत्या तणावाच्या पार्श्‍वभूमीवर इराण आणि अमेरिका यांच्यातील संघर्ष पुन्हा उफाळून आला आहे. इराणने असा दावा केला आहे की, अमेरिकेने त्याच्या ‘तोस्का’ या मालवाहू जहाजावर कारवाई करून ते ताब्यात घेतले आहे. या घटनेला इराणने समुद्री दरोडा ठरवत कठोर प्रत्युत्तराचा इशारा दिला आहे.
इराणच्या लष्करी मुख्यालय हजरत खातम अल-अंबिया यांनी प्रसिद्ध केलेल्या निवेदनात म्हटले आहे की, अमेरिकन सैन्याने ओमान सागरातील आंतरराष्ट्रीय जलक्षेत्रात इराणी जहाजावर हल्ला केला. या कारवाईदरम्यान अमेरिकेच्या समुद्री सैनिकांनी जहाजावर चढाई करून त्याची दिशानियंत्रण प्रणाली निकामी केली आणि जहाज ताब्यात घेतले. दरम्यान, अमेरिकेच्या मध्यवर्ती लष्करी नियंत्रण विभागाने या कारवाईचे समर्थन केले आहे. त्यांच्या म्हणण्यानुसार, संबंधित जहाजाने अमेरिकेच्या नौदल निर्बंधांचे उल्लंघन केले होते. अमेरिकेच्या मार्गदर्शित क्षेपणास्त्रांनी सुसज्ज युद्धनौकेने जहाजाला अडवून वारंवार इशारा दिला होता. मात्र जहाजाच्या कर्मचार्‍यांनी आदेशांचे पालन न केल्याने गोळीबार करून त्याचे इंजिन निकामी करण्यात आले. त्यानंतर जहाजावर चढाई करून ते ताब्यात घेण्यात आले. अमेरिकेने ही कारवाई नियोजनबद्ध आणि संयमित असल्याचा दावा केला आहे. सध्या जहाजावर तैनात सैनिकांकडून त्यातील मालाची तपासणी सुरू असल्याचेही सांगण्यात आले आहे. माजी अध्यक्ष डोनाल्ड ट्रम्प यांनी समाज माध्यमावर प्रतिक्रिया देताना सांगितले की, जहाजाला थांबण्याचे निर्देश देण्यात आले होते, परंतु ते न पाळल्याने थेट कारवाई करण्यात आली. ही घटना अशा वेळी घडली आहे, जेव्हा अमेरिकन प्रतिनिधीमंडळ पाकिस्तानमध्ये जाऊन इराणसोबत चर्चेची पुढील फेरी घेणार असल्याचे जाहीर झाले होते. त्यामुळे तात्पुरत्या युद्धविरामाला मुदतवाढ मिळण्याची शक्यता व्यक्त केली जात होती. या प्रतिनिधीमंडळाचे नेतृत्व उपराष्ट्राध्यक्ष जेडी व्हान्स करणार असून, स्टीव्ह विटकॉफ आणि जेरेड कुशनर यांचाही त्यात समावेश असणार आहे.