मधुकर अप्पाराव सरपते यांना पर्यावरणपूरक श्रद्धांजली; कुटुंबाचा प्रेरणादायी निर्णय

मादळमोही : दिवंगत मधुकर अप्पाराव सरपते यांच्या स्मृतीप्रित्यर्थ त्यांच्या कुटुंबीयांनी पारंपारिक धार्मिक विधींना फाटा देत पर्यावरणसंवर्धनाचा संदेश देणारी एक आगळीवेगळी श्रद्धांजली अर्पण केली. या उपक्रमामुळे परिसरात चर्चेला उधाण आले असून अनेकांनी या निर्णयाचे कौतुक केले आहे.
दिवंगतांच्या स्मरणार्थ सामान्यतः करण्यात येणारे दहावा, तेरावा तसेच विविध कर्मकांड यांना बाजूला ठेवत सरपते कुटुंबीयांनी निसर्गाशी जोडलेला मार्ग स्वीकारला. त्यांच्या बंधू भास्कर सरपते, गणपत सरपते तसेच सुपुत्र दीपक सरपते यांनी पुढाकार घेत हा पर्यावरणपूरक उपक्रम राबविला. परंपरेनुसार अस्थी नदीत विसर्जित करण्याची प्रथा असते. मात्र सरपते कुटुंबीयांनी वेगळा विचार करत अस्थी मादळमोही येथील त्यांच्या शेतजमिनीत खड्डा खणून तेथेच विधिपूर्वक पुरल्या. त्याच ठिकाणी दिवंगतांच्या स्मृती जपण्यासाठी चिकूचे झाड लावण्यात आले. या झाडाद्वारे स्मृती आणि निसर्ग संवर्धन या दोन्ही गोष्टी एकत्र जोडण्याचा प्रयत्न करण्यात आला आहे. कुटुंबीयांच्या मते, झाड वाढत राहील तसतशी त्यांच्या प्रिय व्यक्तीची आठवणही जिवंत राहील. आजच्या काळात वाढते प्रदूषण, जंगलतोड आणि हवामान बदल यामुळे वृक्षारोपण आणि पर्यावरण जपण्याचे महत्त्व अधिक अधोरेखित झाले आहे. अशा पार्श्वभूमीवर हा उपक्रम केवळ श्रद्धांजली न राहता समाजाला एक सकारात्मक दिशा देणारा संदेश ठरला आहे. निसर्ग हाच सृष्टीचा खरा आधार आहे. त्याचे संवर्धन करणे हीच खरी श्रद्धांजली आहे, असा भावनिक आणि विचारप्रवर्तक संदेश या प्रसंगी व्यक्त करण्यात आला. या उपक्रमावेळी कुटुंबातील पुतणे, सुना तसेच इतर नातेवाईक उपस्थित होते. साध्या पण अर्थपूर्ण पद्धतीने पार पडलेल्या या कार्यक्रमात शांतता आणि भावनिक वातावरण पाहायला मिळाले. ग्रामस्थांनीही या उपक्रमाचे मनापासून स्वागत केले. पारंपारिक विधींऐवजी निसर्गसंवर्धनातून श्रद्धांजली अर्पण करण्याचा हा निर्णय समाजासाठी प्रेरणादायी असल्याचे मत अनेकांनी व्यक्त केले. सरपते कुटुंबीयांचा हा निर्णय समाजात एक नवा विचार रुजवणारा ठरतो आहे. पारंपारिक श्रद्धांजली पद्धतीबरोबरच पर्यावरणपूरक मार्गही स्वीकारता येतो, हे या उपक्रमातून स्पष्ट झाले आहे. अशा प्रकारचे उपक्रम भविष्यात अधिक प्रमाणात राबविले गेल्यास निसर्गसंवर्धनाला मोठा हातभार लागेल, असा विश्वास व्यक्त होत आहे.