भारत- जर्मनीमधील राजनैतिक संबंध 75 वर्ष जुने : पंतप्रधान मोदी

गांधीनगर ः गुजरातमधील गांधीनगर येथे आज, सोमवारी पंतप्रधान नरेंद्र मोदी आणि जर्मनीचे चान्सलर फ्रेडरिक मर्ज यांच्यात द्विपक्षीय चर्चा झाली. या वेळी पंतप्रधान मोदी म्हणाले की, भारत आणि जर्मनी हे निकटचे सहकारी देश आहेत. त्यामुळेच आज भारतात 2,000 हून अधिक जर्मन कंपन्या कार्यरत आहेत. हे भारतावरील जर्मनीच्या अढळ विश्‍वासाचे प्रतीक आहे.
भारत आणि जर्मनी यांच्यातील राजनैतिक संबंधांना यंदा 75 वर्षे पूर्ण होत असून, ही मैत्री केवळ ऐतिहासिक नसून भविष्योन्मुख सहकार्याचे भक्कम उदाहरण ठरत आहे.  पंतप्रधान मोदी यांनी भारत-जर्मनी संबंधांचा उल्लेख करताना दोन्ही देशांमधील विश्‍वास, स्थैर्य आणि दीर्घकालीन सहकार्यावर भर दिला. सध्या भारतात दोन हजारांहून अधिक जर्मन कंपन्या कार्यरत असून, उत्पादन, वाहन उद्योग, ऊर्जा, तंत्रज्ञान आणि अभियांत्रिकी क्षेत्रात त्यांचे मोठे योगदान आहे. हे चित्र भारताच्या आर्थिक क्षमतेवर आणि धोरणात्मक स्पष्टतेवर जर्मनीने दाखवलेल्या विश्‍वासाचे द्योतक मानले जात आहे. भारत आणि जर्मनी यांच्यातील सहकार्य केवळ उद्योग आणि व्यापारापुरते मर्यादित न राहता शिक्षण व संशोधन क्षेत्रातही विस्तारत आहे. उच्च शिक्षणासाठी तयार करण्यात आलेल्या नव्या रोडमॅपमुळे दोन्ही देशांतील विद्यापीठे, संशोधन संस्था आणि विद्यार्थी यांना परस्पर सहकार्याच्या नव्या संधी उपलब्ध होणार आहेत. जर्मनीतील नामांकित विद्यापीठांनी भारतात शैक्षणिक उपक्रम सुरू करावेत, असे आमंत्रण भारताने दिले असून, यामुळे ज्ञानाधिष्ठित अर्थव्यवस्थेला बळ मिळण्याची शक्यता आहे. याशिवाय आरोग्य क्षेत्रात कुशल मनुष्यबळाची देवाणघेवाण सुरू असून, भारतातील प्रशिक्षित वैद्यकीय व आरोग्य क्षेत्रातील व्यावसायिक जर्मनीसाठी महत्त्वाची भूमिका बजावत आहेत. ही भागीदारी दोन्ही देशांच्या सामाजिक आणि आर्थिक गरजांना पूरक ठरत आहे.  मागील वर्षी धोरणात्मक भागीदारीच्या 25 वर्षांचा टप्पा पूर्ण केल्यानंतर, यंदा 75 वर्षांच्या राजनैतिक संबंधांचा उत्सव साजरा होत आहे. व्यापार, गुंतवणूक, तंत्रज्ञान, हरित ऊर्जा आणि नवोन्मेष या क्षेत्रांत भारत आणि जर्मनीचे सहकार्य अधिक व्यापक होण्याची चिन्हे आहेत. एकूणच, भारत-जर्मनी संबंध हे केवळ द्विपक्षीय हितसंबंधांपुरते मर्यादित न राहता जागतिक विकास, शांतता आणि स्थैर्यासाठी महत्त्वाची भूमिका बजावत आहेत. बदलत्या जागतिक परिस्थितीत ही भागीदारी भविष्यात अधिक प्रभावी आणि परिणामकारक ठरेल, अशी अपेक्षा व्यक्त केली जात आहे.

संरक्षण, सुरक्षा आणि धोरणात्मक सहकार्य
संरक्षण आणि सुरक्षा क्षेत्रातील वाढते सहकार्य हे भारत-जर्मनी संबंधांचे आणखी एक महत्त्वाचे अंग आहे. संरक्षण व्यापाराशी संबंधित प्रक्रिया सुलभ करण्यासाठी जर्मनीने उचललेल्या पावलांबद्दल पंतप्रधान मोदी यांनी समाधान व्यक्त केले. संरक्षण तंत्रज्ञान, संयुक्त संशोधन आणि औद्योगिक सहकार्यामुळे दोन्ही देशांमधील धोरणात्मक भागीदारी अधिक मजबूत होत असल्याचे संकेत मिळतात.