पी.व्ही.सिंधू मलेशिया ओपनच्या उपांत्य फेरीत पराभूत

क्वालालम्पूर : मलेशिया ओपन सुपर 1000 बॅडमिंटन स्पर्धेतील महिला एकेरीच्या उपांत्य फेरीत भारताच्या पी. व्ही. सिंधूचा प्रवास थांबला. हंगामातील पहिल्याच स्पर्धेत तिला चीनच्या जागतिक क्रमवारीत दुसर्‍या स्थानावर असलेल्या वांग शीयीकडून 16-21, 15-21 अशा सरळ गेममध्ये पराभव स्वीकारावा लागला. या निकालासह स्पर्धेतील भारताचे आव्हानही संपुष्टात आले.
दोन वेळा ऑलिम्पिक पदकविजेती असलेल्या सिंधूसाठी हा सामना विशेष होता. गेल्या वर्षी ऑक्टोबरनंतर ती पहिल्यांदाच आंतरराष्ट्रीय स्पर्धेत उतरली होती. पायाच्या दुखापतीतून सावरत पुनरागमन करणार्‍या सिंधूने सुरुवातीला चांगली झुंज दिली, मात्र निर्णायक क्षणी वाढता दबाव आणि अनपेक्षित चुका तिच्या अडचणी ठरल्या. पहिल्या गेममध्ये सिंधूने आक्रमक खेळ करत शक्तिशाली स्मॅशेसची मालिका रचली. वांगच्या काही चुका भांडवलात काढत तिने 9-7 अशी आघाडी घेतली. मात्र मध्यंतरापर्यंत वांगने संयम राखत पुनरागमन केले आणि एक गुणाची आघाडी मिळवली. या टप्प्यावर सिंधूचा नेटवरील खेळ अपेक्षेइतका प्रभावी राहिला नाही. ब्रेकनंतर दोन्ही खेळाडूंना शॉट्सची अचूकता राखण्यात अडचणी आल्या आणि स्कोअर 13-13 असा बरोबरीत गेला. त्यानंतर वांगने खेळाचा वेग वाढवत आक्रमक पवित्रा घेतला. अचूक लिफ्ट्स आणि सातत्यपूर्ण हल्ल्याच्या जोरावर तिने 18-14 अशी आघाडी मिळवत पहिला गेम आपल्या नावावर केला. दुसर्‍या गेमच्या सुरुवातीला सिंधूने काही अनफोर्स्ड चुका केल्याने ती 1-3 अशी पिछाडीवर गेली. मात्र लवकरच तिने स्वतःला सावरत उत्कृष्ट रॅली खेळल्या आणि 6-3 अशी आघाडी घेतली. वांगने अंतर कमी करण्याचा प्रयत्न केला, तरी सिंधूने कोर्टच्या कोपर्‍यांत अचूक, कोन असलेले शॉट्स खेळत ब्रेकपर्यंत 11-6 अशी आघाडी कायम ठेवली. ब्रेकनंतर वांगने अधिक आक्रमक धोरण स्वीकारले. सिंधूने काही सुंदर नेट शॉट्ससह 13-9 अशी आघाडी राखली, परंतु त्यानंतर झालेल्या सलग चुकांचा फायदा घेत वांगने सामना पुन्हा 13-13 असा बरोबरीत आणला.