गुरुपौर्णिमा उत्सवाच्या निमित्ताने गुरुदेव दत्त पीठ देवगड येथे भाविकांची तोबा गर्दी

नेवासा फाटा(प्रतिनिधी)
गुरुपौर्णिमा उत्सवाच्या निमित्ताने नेवासा तालुक्यातील श्री क्षेत्र देवगड येथे श्री गुरुदेव दत्त पिठाचे प्रमुख महंत गुरुवर्य हभप श्री भास्करगिरीजी महाराज यांच्या आयोजित कीर्तन सोहळयाला उच्चांकी गर्दी दिसून आली.गुरुपौर्णिमा उत्सवाच्या निमित्ताने सुमारे तीन लाख भाविकांनी भगवान दत्तात्रयांचे दर्शन घेतले.

“दिगंबरा दिगंबरा.. श्रीपाद वल्लभ दिगंबरा”…व “श्री समर्थ सदगुरू किसनगिरी बाबा की जय” च्या नामघोषाने देवगडनगरी दुमदुमली होती.गुरूंचा महिमा व लीला अगाध असा असून संत हे जगाचे कृपाळू मायबाप आहे, गुरूंबद्दल असलेल्या भक्तीभावाला व श्रद्धेला शेवटच्या श्वासापर्यंत जपा असे आवाहन गुरुवर्य श्री भास्करगिरीजी बाबांनी यावेळी झालेल्या कीर्तन सोहळयात बोलतांना केले.

गुरुपौर्णिमेच्या निमित्ताने गुरुवर्य श्री भास्करगिरीजी महाराज व उत्तराधिकारी स्वामी प्रकाशानंदगिरीजी महाराज यांच्या हस्ते पहाटेच्या सुमारास भगवान दत्तात्रय,श्री समर्थ सदगुरू किसनगिरी बाबांच्या समाधीस अभिषेक घालण्यात आला. देवगड येथील ज्ञानसागर सभामंडपामध्ये गुरुवर्य परमपूज्यनीय श्री भास्करगिरीजी बाबा यांचे गुरू शिष्य परंपरा व गुरू महिमा यावर हरिकीर्तन झाले.

श्री समर्थ सदगुरू किसनगिरीजी बाबांनी गुरुदेव दत्त पिठाची निर्मिती करतांना अनवाणी पायाने फिरले,त्यांनी यासाठी फार कष्ट सोसले त्यांनी देवगड येथे गुरुदेव दत्त पीठ हे आपल्या सुखासाठी व मानव जातीच्या उद्धारासाठी निर्माण केले आहे,त्यांनी दिलेल्या विचार प्रणालीचे पालन करणे हे आपल्या सर्वांचे कर्तव्य असून गुरूंबद्दल असलेला भक्ती भाव व श्रद्धेला शेवटच्या श्वासापर्यंत जपा असे आवाहन त्यांनी यावेळी बोलतांना केले.

यावेळी झालेल्या कीर्तन सोहळयाच्या प्रसंगी महाराष्ट्राच्या कानाकोपऱ्यातून आलेल्या भाविकांनी गुरुपौर्णिमेच्या निमित्ताने गुरुवर्य श्री भास्करगिरीजी बाबांसह उत्तराधिकारी स्वामी प्रकाशानंदगिरीजी महाराज यांचे संतपूजन केले.यावेळी झालेल्या किर्तनानंतर महाआरती करण्यात आली.महाआरतीच्या प्रसंगी देवगडचे दत्त मंदिर प्रांगण हजारो भाविकांच्या गर्दीने फुलून गेले होते.मंदिर प्रांगणात विविध दुकाने मोठ्या प्रमाणात थाटल्याने यात्रेचे स्वरूप प्राप्त झाले होते.

यावेळी झालेल्या किर्तन प्रसंगी संतसेवक हभप दिनकरजी महाराज मते,गुरुवर्य बाबांच्या मातोश्री सरुआई पाटील,स्वामींच्या मातोश्री सौ.मिराबाई मते,नारायण महाराज ससे,डॉ.जनार्धन महाराज मेटे,गणपत महाराज आहेर,संतसेवक बाळू महाराज कानडे,तात्या महाराज शिंदे,नामदेव महाराज कंधारकर, मृदुंगाचार्य गिरीजीनाथ महाराज जाधव,अमोल महाराज बोडखे, रामनाथ महाराज पवार,संजय महाराज निथळे,शुभम महाराज बनकर,सेवेकरी बबनराव वरघुडे,दिनकरराव कदम,रविंद्र मुनोत,ज्ञानदेव लोखंडे,बद्रीनाथ फोलाणे,रामेश्वर तनपूरे, संभाजीनगर येथील भक्त मंडळाचे सेवेकरी गायक रामजी विधाते, बजरंग विधाते,मुरमे गावचे सरपंच अजय साबळे, उपसरपंच भीमाशंकर वरखडे,नगर भक्त मंडळाचे सेवेकरी,श्री समर्थ सदगुरू किसनगिरी बाबा स्वच्छता मंडळाचे सेवेकरी यांच्यासह भाविक हजारोंच्या संख्येने उपस्थित होते. उपस्थित भाविकांना गंगापूर येथील सोमाणी परिवाराच्या वतीने महाप्रसादाचे वाटप करण्यात आले.

गुरुपौर्णिमा उत्सवाच्या निमित्ताने आलेल्या हजारो भाविकांनी गुरुवर्य श्री भास्करगिरीजी बाबांचे दर्शन घेतले यावेळी गुरुवर्य बाबा व स्वामी प्रकाशानंदगिरीजी महाराज यांनी हसतमुखाने भाविकांशी सुसंवाद साधला.देवगडचे मुख्य प्रवेशद्वार,श्री सिद्धेश्वर मंदिर,श्री समर्थ सदगुरू किसनगिरी बाबा समाधी मंदिर याठिकाणी भाविकांची झालेली गर्दी लक्षणीय होती.