आयएएस पूजा खेडकरचे प्रशिक्षण आठवडाभर थांबवले

पुणे ः प्रशिक्षणार्थी आयएएस अधिकारी पूजा खेडकर यांचे अनेक कारनामे समोर येतांना दिसून येत आहे. त्यांनी सादर केलेले दिव्यांगांचे प्रमाणपत्र, नाव बदलून अनेक वेळेस दिलेल्या परीक्षा, पालकांचे उत्पन्न, ओबीसी प्रवर्गाचा गैरवापर, यासारखे अनेक कारनामे समोर आल्यानंतर पूजा खेडकर यांचे प्रशिक्षण आठवडाभरासाठी थांबवण्यात आले आहे.
पूजा खेडकरचे 15 ते 19 जुलै या कालावधीत अकोल्यातील आदिवासी विकास प्रकल्पात इंटर्न म्हणून रुजू होणार होती, मात्र वाशिमच्या जिल्हा अधिकार्‍यांनी याला स्थगिती दिली आहे. भारतीय प्रशासकीय सेवेत निवड होण्यासाठी पूजावर अपंगत्व आणि ओबीसी आरक्षण कोट्याचा गैरवापर केल्याचा आरोप आहे. पूजाच्या अपंग आणि ओबीसी प्रमाणपत्राची पोलिस चौकशी होणार आहे. प्रमाणपत्र देणार्‍या डॉक्टरचीही चौकशी केली जाईल. प्रशिक्षणार्थी आयएएस अधिकारी पूजा खेडकर यांनी अपंगत्व प्रमाणपत्रासाठी दोनदा अर्ज केला होता. पुण्याच्या औंध रुग्णालयाने त्यांचा अर्ज फेटाळला होता. औंध हॉस्पिटलने पूजाच्या अर्जाला उत्तर देताना सांगितले की, ’तुम्ही 23 ऑगस्ट 2022 रोजी अपंगत्व प्रमाणपत्रासाठी अर्ज केला होता. 11 ऑक्टोबर 2022 रोजी तुम्ही नमूद केलेल्या लोकोमोटर अपंगत्वाची वैद्यकीय पथकाने तपासणी केली होती. अहवालाच्या आधारे तुमचा दावा न्याय्य असल्याचे संघाने मानले नाही. आपल्या नावे अपंगत्व प्रमाणपत्र जारी करणे शक्य नाही. लोकोमोटिव्ह अपंगत्व हाडे किंवा स्नायूंना प्रभावित करते, ज्यामुळे हात आणि पाय यांच्या हालचालींमध्ये अडचण येऊ शकते. यानंतर त्यांनी अपंगत्व प्रमाणपत्रासाठी पिंपरी-चिंचवडच्या शासकीय रुग्णालयात अर्ज केला, तो स्वीकारण्यात आला. पूजाने केंद्रीय लोकसेवा आयोगाला दिलेल्या प्रतिज्ञापत्रात दावा केला आहे की ती मानसिकदृष्ट्या अक्षम आहे आणि तिला दिसण्यातही त्रास होत आहे. वैद्यकीय चाचणी देणे आवश्यक असतानाही पूजाने 6 वेळा वैद्यकीय चाचणी देण्यास नकार दिला होता. पूजाची पहिली वैद्यकीय चाचणी एप्रिल 2022 मध्ये दिल्ली एम्समध्ये होणार होती. आपण कोविड पॉझिटिव्ह असल्याचे कारण देत त्याने यात सहभागी होण्यास नकार दिला होता. मात्र, पूजाने परीक्षेला बसण्यास नकार दिला होता, तेव्हा निवड का आणि कशी झाली, हे स्पष्ट झालेले नाही.

केंद्रीय समिती देखील अहवाल करणार सादर – वादात सापडलेल्या प्रशिक्षणार्थी आयएएस अधिकारी पूजा खेडकर यांच्या उमेदवारीची पडताळणी करण्यासाठी केंद्राने एक सदस्यीय समिती स्थापन केली आहे. केंद्राने एका निवेदनात म्हटले आहे की, हा तपास अतिरिक्त सचिव दर्जाच्या अधिकार्‍याकडून केला जात आहे. 2023 च्या बॅचचे अधिकारी खेडकर यांच्या उमेदवारीचे दावे आणि इतर तपशीलांची पडताळणी करणे हा त्याचा उद्देश असेल. ही समिती दोन आठवड्यात अहवाल सादर करणार आहे. त्यानंतर पूजा खेडकर यांना या पदावर ठेवायचे की नाही, याचा निर्णय केंद्र सरकार घेणार आहे.तिच्या चौकशीसाठी स्थापन करण्यात आलेल्या समितीबाबत पूजाला विचारले असता तिने कोणतीही प्रतिक्रिया देण्यास नकार दिला. यावर पूजा म्हणाली, मला यावर काहीही बोलण्याचा अधिकार नाही. समितीसमोर माझी बाजू मांडणार आहे.