तिहेरी अपघातात सहा जणांचा मृत्यूअंमळनेरजवळील घटना ; मृतांमध्ये एकाच कुटुंबातील पाच जणांचा समावेश

अंमळनेर : जळगाव जिल्ह्यातील अंमळनेर-धुळे महामार्गावर मंगरूळ गावाजवळ मंगळवारी सकाळी झालेल्या भीषण तिहेरी अपघातात सहा जणांचा जागीच मृत्यू झाला. एका चारचाकी वाहनाने राज्य परिवहन महामंडळाच्या बसला आणि दुचाकीला धडक दिल्याने ही दुर्घटना घडली. मृतांमध्ये गुजरातमधील एका कुटुंबातील पाच जणांचा तसेच धरणगाव येथील एका दुचाकीस्वाराचा समावेश आहे.
मिळालेल्या माहितीनुसार, सकाळी सुमारे सात वाजण्याच्या सुमारास मंगरूळ गावाजवळील वृंदावन उपहारगृहासमोर हा अपघात झाला. राज्य परिवहनची बस आणि दुचाकी अंमळनेरहून धुळ्याकडे जात असताना समोरून येणारे चारचाकी वाहन अचानक नियंत्रणाबाहेर गेले. त्यानंतर वाहनाने बस आणि दुचाकीला जोरदार धडक दिली. धडकेची तीव्रता इतकी मोठी होती की दुचाकीचा पूर्णपणे चुराडा झाला. या अपघातात दुचाकीस्वाराचा घटनास्थळीच मृत्यू झाला. तसेच चारचाकी वाहनाचा पुढील भाग पूर्णपणे चिरडला गेल्याने त्यामधील पाच जणांचा जागीच मृत्यू झाला. त्यामुळे परिसरात शोककळा पसरली आहे. मृतांमध्ये गुजरातमधील व्यारा येथील आदित्य चंद्रकांत महाजन, अनिता सुरेश महाजन, निर्मला नंदलाल महाजन, नंदलाल गोपाल महाजन आणि सुरेश विक्रम महाजन यांचा समावेश आहे. हे सर्वजण अंमळनेर येथे होणार्‍या साखरपुडा समारंभासाठी निघाले होते. आनंदाच्या सोहळ्यासाठी निघालेल्या या कुटुंबाचा प्रवास मात्र दुःखद दुर्घटनेत संपुष्टात आला. अपघाताची माहिती मिळताच आपत्कालीन सेवा आणि पोलिसांनी तातडीने घटनास्थळी धाव घेतली. पोलीस निरीक्षक दत्तात्रय निकम यांच्या मार्गदर्शनाखाली बचावकार्य सुरू करण्यात आले. जखमींना तत्काळ रुग्णवाहिकेतून उपचारासाठी पाठविण्यात आले. दरम्यान, अपघातग्रस्त चारचाकी वाहनात एक लहान मुलगा अडकून पडला होता. वाहनाचा पुढील भाग चिरडल्यामुळे त्याला बाहेर काढणे अवघड झाले होते. ग्रामस्थ, पोलीस कर्मचारी आणि राज्य परिवहन कर्मचार्‍यांनी संयुक्त प्रयत्न करून वाहनाचे वाकलेले भाग बाजूला केले आणि मुलाची सुखरूप सुटका केली. या वेळी उपस्थित नागरिकांनी मदतकार्याला मोठा प्रतिसाद दिला. या अपघातात राज्य परिवहन बसमधील दीपक दिलीप पाटील हे प्रवासी जखमी झाले असून त्यांच्यावर उपचार सुरू आहेत. काही अन्य प्रवाशांनाही किरकोळ दुखापती झाल्याची माहिती आहे. मृतांचे मृतदेह शवविच्छेदनासाठी अंमळनेर ग्रामीण रुग्णालयात पाठविण्यात आले आहेत. अपघातामुळे महामार्गावरील वाहतूक काही काळ विस्कळीत झाली होती. मात्र पोलिसांनी तत्काळ अपघातग्रस्त वाहने हटवून वाहतूक पूर्ववत केली. घटनेचा पुढील तपास सुरू आहे.