पुण्यात जनगणना करणाऱ्या महिला कर्मचाऱ्याला मारहाण; पालिका आयुक्तांचे पोलिसांना कारवाईचे निर्देश

पुणे : पुण्यात जनगणनेचे काम करणाऱ्या एका महिला कर्मचाऱ्याला मारहाण झाल्याची धक्कादायक घटना समोर आली आहे. महापालिका आयुक्तांनी या प्रकरणाची गंभीर दखल घेतली असून, त्यांनी पोलिसांना पत्र लिहून हल्लेखोरांवर कडक कारवाई करण्याचे निर्देश दिले आहेत.

देशासह राज्यात सध्या जनगणनेचे काम मोठ्या प्रमाणावर सुरू आहे. या मोहिमेसाठी शिक्षकांसह विविध सरकारी कार्यालयांतील कर्मचारी ‘प्रगणक’ म्हणून घरोघरी जाऊन माहिती गोळा करत आहेत. मात्र, हे कर्मचारी नक्की कोणते काम करत आहेत आणि ही माहिती कशासाठी घेतली जात आहे, याची स्पष्ट कल्पना नसल्यामुळे अनेक ठिकाणी या कर्मचाऱ्यांना नागरिकांच्या रोषाला सामोरे जावे लागत आहे. अशातच पुण्यात महिला कर्मचाऱ्याला झालेल्या मारहाणीमुळे प्रगणकांमध्ये संतापाचे आणि चिंतेचे वातावरण आहे.