भंडार्‍यातील आश्रमशाळेत 37 मुलांना विषबाधा

भंडारा : जिल्ह्यातील एका आदिवासी आश्रमशाळेत शिकणार्‍या 37 विद्यार्थ्यांना जेवणातून विषबाधा झाल्याची घटना समोर आली आहे. तुमसर तालुक्यातील येरली येथे आश्रमशाळेत हा प्रकार घडला. विद्यार्थ्यांना उपचारासाठी तात्काळ रुग्णालयात दाखल करण्यात आले असून चौघांची प्रकृती गंभीर असल्याची माहिती आहे. तब्बल 37 विद्यार्थ्यांना जेवणातून विषबाधा झाली. चौघांची स्थिती चिंताजनक असून उर्वरित 33 जणांची प्रकृती धोक्याबाहेर असल्याची माहिती आहे. विद्यार्थांना काल दुपारच्या जेवणात बटाटा, वाटाणा, चपाती, वरण, भात असा आहार देण्यात आला होता. यानंतर काही वेळातच विद्यार्थ्यांच्या पोटात दुखायला लागले. काही विद्यार्थांना चक्कर येऊ लागली. याची तक्रार विद्यार्थ्यांनी शिक्षकांकडे केली.