लंडनमध्ये तिरंग्याचा अवमान करणार्‍याला अटक

अमृतसर/वृत्तसंस्था ः  पंजाबमध्ये अमृतपाल सिंग यांच्यावर कारवाईचा निषेध म्हणून लंडनमधील भारतीय दूतावासाबाहेर तिरंग्याचा अवमान करणारा खलिस्तानी समर्थक अवतार सिंग खांडा याला अटक करण्यात आली आहे. खांडा हा प्रतिबंधित गट बब्बर खालसा इंटरनॅशनलचा सदस्य आहे. त्याचवेळी पंजाबमध्ये सुरू असलेल्या तपासात खांडा हा दुसरा कोणी नसून अमृतपालचा हस्तक असल्याचेही समोर येत आहे.
लंडनमध्ये पकडलेला खांडा हा खलिस्तान लिबरेशन फोर्सशी संबंधित असलेला कुवंत सिंग खुराणा याचा मुलगा आहे. खांडा हा पाकिस्तानात लपलेला बीकेआयचा प्रमुख सदस्य परमजीत सिंग पम्मा याचा जवळचा मित्र आहे. पम्माच्या आदेशानुसारच अवतार सिंग कारवाई करतो. दुबईत लक्झरी लाइफ जगणारा अमृतपाल त्याच्या काकांचे ट्रान्सपोर्टचे काम पाहत असे, मात्र काही वर्षांपूर्वी काका कुटुंबासह कॅनडाला गेले होते, असे पोलिस तपासात समोर आले आहे. अमृतपाल या काळात काही देशांमध्ये गेला होता. जिथे तो इघखच्या जवळच्या सहकार्‍यांच्या संपर्कात आला. पम्माच्या सांगण्यावरून खांडाने अमृतपाल सिंगला पंजाबमधील खलिस्तान मोहिमेसाठी तयार केले. यानंतर जॉर्जियामध्ये अमृतपाल सिंगला प्रशिक्षण देण्यात आले. या प्रशिक्षणात शीख फॉर जस्टिसचा दहशतवादी गुरपतवंत सिंग पन्नूचाही पाठिंबा मिळाला. अमृतपालने येथे शीख धर्माच्या आवश्यक गोष्टी शिकल्या. श्री गुरू ग्रंथ साहिबबद्दल ज्ञान मिळवले, जेणेकरून तो स्वतःला धार्मिक गुरुसारखा दाखवू शकेल. सप्टेंबर 2022 पूर्वी अमृतपाल सिंगला फारसे कोणी ओळखत नव्हते. अमृतपालला भारतात पाठवण्याची तयारी सुरू असताना सोशल मीडियावर अकाउंट तयार करण्यात आले, ज्यातून अमृतपालला लोकप्रिय करण्याचे प्रयत्न सुरू झाले. अमृतपाल परत आल्यावर या खात्यांमुळे तो तरुणांमध्ये लोकप्रिय झाला.