जनकल्याण मराठी पत्रकार संघाच्या जिल्हाध्यक्षपदी प्रशांत बाफना यांची निवड; अहिल्यानगरमधून कौतुकाचा वर्षाव

शेवगाव: बालमटाकळी येथील मूळ रहिवासी आणि सध्या अहिल्यानगर येथे वास्तव्यास असलेले पत्रकार प्रशांत बाफना यांची जनकल्याण मराठी पत्रकार संघाच्या अहिल्यानगर जिल्हाध्यक्षपदी निवड करण्यात आली आहे, अशी माहिती पत्रकार संघाचे संस्थापक अध्यक्ष संतोष जाधव यांनी दिली.

पत्रकारिता हा लोकशाहीचा चौथा स्तंभ मानला जातो. समाजमनातील वास्तव जनतेपर्यंत पोहोचवण्याची महत्त्वपूर्ण जबाबदारी पत्रकारांवर असून, पक्ष, जात, धर्म, पंथ आणि प्रांताची बंधने बाजूला ठेवून निर्भीडपणे वृत्तंकन करणे अपेक्षित असते. सध्याच्या डिजिटल आणि पेड न्यूजच्या काळात प्रशांत बाफना हे विश्वासार्ह आणि मुक्त पत्रकारितेसाठी अहिल्यानगर जिल्हाभरात ओळखले जातात. समाजाच्या तळागाळापर्यंत पोहोचून तेथील सकारात्मक कार्य आणि वास्तववादी घटना बातम्यांच्या माध्यमातून मांडण्याच्या त्यांच्या कार्याची दखल घेऊन नाशिक स्थित जनकल्याण मराठी पत्रकार संघाच्या जिल्हाध्यक्षपदी ही निवड करण्यात आल्याचे रफिक सय्यद, सुधीर उमराळकर, मनिषा पवार आणि अकिल पटेल यांनी सांगितले.

पत्रकार प्रशांत बाफना यांच्याकडे ‘एकता फाउंडेशन अहिल्यानगर’च्या प्रसिद्धीप्रमुखपदाचीही जबाबदारी आहे. त्यांची जनकल्याण मराठी पत्रकार संघाच्या जिल्हाध्यक्षपदी निवड झाल्याबद्दल एकता फाउंडेशन महाराष्ट्र राज्याच्या कोअर कमिटीतील पदाधिकाऱ्यांसह अहिल्यानगर जिल्ह्यातील सामाजिक, राजकीय व पत्रकारिता क्षेत्रातील विविध मान्यवरांनी त्यांचे अभिनंदन केले आहे.