गोल्डन बूटच्या शर्यतीत एम्बाप्पे अव्वलफिफा विश्‍वचषक : मेस्सी दुसर्‍या स्थानावर

नवी दिल्ली : फिफा विश्‍वचषक 2026 स्पर्धा आता अत्यंत निर्णायक टप्प्यात पोहोचली असून उपांत्य फेरीच्या लढतींना रंग चढला आहे. फ्रान्सने मोरोक्कोवर प्रभावी विजय मिळवत उपांत्य फेरीत धडक मारली आहे. त्याचबरोबर स्पर्धेतील सर्वाधिक गोल करणार्‍या खेळाडूला दिल्या जाणार्‍या गोल्डन बूट पुरस्कारासाठीची चुरसही अधिक तीव्र झाली आहे.
या शर्यतीत फ्रान्सचा आघाडीचा खेळाडू किलियन एम्बाप्पे आठ गोल आणि तीन गोलसाहाय्याच्या जोरावर प्रथम क्रमांकावर कायम आहे. त्याच्या सातत्यपूर्ण कामगिरीमुळे फ्रान्सच्या विजेतेपदाच्या आशाही अधिक बळकट झाल्या आहेत. अर्जेंटिनाचा कर्णधार लिओनेल मेस्सी यानेही आठ गोलांची नोंद केली आहे. मात्र त्याच्या नावावर केवळ एक गोलसाहाय्य असल्यामुळे तो सध्या दुसर्‍या स्थानावर आहे. फिफाच्या नियमानुसार समान गोलसंख्या असलेल्या खेळाडूंमध्ये गोलसाहाय्याची संख्या महत्त्वाची ठरते. त्यामुळे एम्बाप्पेला सध्या आघाडी मिळाली आहे. नॉर्वेचा एर्लिंग हालांड सात गोलांसह तिसर्‍या स्थानावर असून इंग्लंडचा हॅरी केन सहा गोल आणि एक गोलसाहाय्यासह चौथ्या क्रमांकावर आहे. फ्रान्सचा उस्मान डेम्बेले पाच गोल आणि दोन गोलसाहाय्यांसह पाचव्या स्थानावर आहे. याशिवाय सेनेगलचा इस्माइला सार, स्पेनचा मिकेल ओयारजाबाल, मेक्सिकोचा ज्युलियन क्विनोनेस, इंग्लंडचा जूड बेलिंगहॅम आणि ब्राझीलचा विनिसियस ज्युनियर यांनी प्रत्येकी चार गोल केले असून प्रत्येकाच्या खात्यात एक गोलसाहाय्याची नोंद आहे. त्यामुळे पुढील सामन्यांमध्ये हे खेळाडूही गोल्डन बूटच्या शर्यतीत मोठे आव्हान निर्माण करू शकतात. फिफाच्या नियमांनुसार दोन किंवा अधिक खेळाडूंनी समान गोल केल्यास प्रथम गोलसाहाय्याची संख्या विचारात घेतली जाते. त्यानंतरही बरोबरी राहिल्यास मैदानावर कमी वेळ खेळलेल्या खेळाडूला प्राधान्य दिले जाते. त्यामुळे उपांत्य फेरीतील प्रत्येक गोल आणि प्रत्येक गोलसाहाय्य गोल्डन बूटच्या निकालावर निर्णायक परिणाम करू शकते. विश्‍वचषक स्पर्धा अंतिम टप्प्याकडे वाटचाल करत असताना गोल्डन बूटसाठीची ही लढत अधिकच रोमांचक बनली असून फुटबॉलप्रेमींचे लक्ष आता एम्बाप्पे, मेस्सी आणि हालांड यांच्या कामगिरीकडे लागले आहे.