मुखेड नगरपरिषदेत स्वप्नील देव यांची वर्ग तीन पदावर नियुक्ती; परिसरात आनंदाचे वातावरण

मुखेड : मुखेड नगरपरिषदेत वर्ग तीन पदावर  स्वप्नील दिलीपराव देव यांची नियुक्ती झाल्याने परिसरात आनंदाचे वातावरण निर्माण झाले आहे. उच्च शिक्षण घेतलेले व अभ्यासू वृत्तीचे स्वप्नील देव यांच्या निवडीमुळे नगरपरिषदेच्या प्रशासकीय कामकाजात नवचैतन्य येईल, अशी अपेक्षा व्यक्त केली जात आहे.
स्वप्नील देव हे शिक्षणाला प्राधान्य देणार्‍या कुटुंबातून आले असून त्यांचे वडील, शिक्षक नेते दिलीपराव देवकांबळे यांनी शिक्षण क्षेत्रात उल्लेखनीय कार्य केले आहे. त्यांच्या प्रेरणेने स्वप्नील यांनीही आपले शैक्षणिक व बौद्धिक भांडार अधिक सक्षम केले आहे. विविध विषयांवर प्रभुत्व मिळवत त्यांनी स्पर्धा परीक्षांमध्ये यश संपादन केले असून त्यांच्या या यशामागे कठोर परिश्रम व चिकाटी आहे. नगरपरिषदेसारख्या महत्त्वाच्या स्थानिक स्वराज्य संस्थेत नियुक्ती झाल्यामुळे स्वप्नील देव यांना नागरिकांच्या समस्या समजून घेऊन त्यांचे निराकरण करण्याची संधी मिळणार आहे. त्यांच्या कार्यक्षमतेमुळे प्रशासन अधिक गतिमान होईल तसेच विकासकामांना चालना मिळेल, असा विश्वास व्यक्त केला जात आहे. त्यांच्या नियुक्तीबद्दल विविध स्तरातून अभिनंदनाचा वर्षाव होत असून सामाजिक, शैक्षणिक व राजकीय क्षेत्रातील मान्यवरांनी त्यांना शुभेच्छा दिल्या आहेत. पुढील काळात स्वप्नील देव हे आपल्या कर्तव्यदक्षतेने आणि प्रामाणिक कार्यशैलीने नगरपरिषदेत नावलौकिक मिळवतील, अशी अपेक्षा व्यक्त होत आहे. दरम्यान, मुखेड तालुका मराठी पत्रकार परिषदेचे संस्थापक अध्यक्ष दादाराव आगलावे यांनी स्वप्नील देव यांचा ‘गोविंदवाणी’ काव्यसंग्रह देऊन सन्मान केला.