रुपया विक्रमी नीचांकी पातळीवरपरकीय चलनाच्या तुलनेत 95.20 वर पोहोचला

नवी दिल्ली : भारतीय चलनाने आज मोठी घसरण नोंदवली असून परकीय चलनाच्या तुलनेत त्याची किंमत आतापर्यंतच्या सर्वात खालच्या स्तरावर पोहोचली आहे. भारतीय रुपया गुरूवारी डॉलरच्या तुलनेत 95.20 च्या विक्रमी नीचांकी पातळीवर पोहोचला आहे. मध्यपूर्वेतील संघर्ष, ऊर्जा पुरवठ्यातील अडथळे आणि जागतिक स्तरावरील तणाव यांचा थेट परिणाम या घसरणीत दिसून येत आहे.
आर्थिक तज्ज्ञांच्या मते, परदेशी गुंतवणूकदारांकडून सातत्याने होत असलेली गुंतवणुकीची माघार हेही एक महत्त्वाचे कारण आहे. चालू वर्षाच्या सुरुवातीपासूनच रुपयावर दबाव होता. यापूर्वी मागील वर्षाच्या अखेरीस प्रथमच रुपया नव्वदीच्या पातळीच्या पुढे गेला होता, आणि आता त्यात आणखी घसरण झाली आहे. मध्यपूर्वेतील तणावामुळे निर्माण झालेल्या ऊर्जा संकटाचा भारतावर मोठा परिणाम होत आहे. कच्च्या तेलाच्या वाढत्या किमतींमुळे देशाचे आयात खर्च वाढत आहेत. यामुळे इंधनदर वाढण्याची शक्यता असून त्याचा परिणाम सर्वसामान्यांच्या खर्चावर होणार आहे. दरम्यान, दैनंदिन वापरातील अनेक वस्तूंच्या किमती वाढण्याची शक्यता व्यक्त केली जात आहे. गॅस, प्लास्टिक तसेच पेट्रोकेमिकलशी संबंधित उत्पादनांचा पुरवठा प्रभावित होऊ शकतो. त्यामुळे किरकोळ महागाई वाढण्याची भीती व्यक्त केली जात आहे. परकीय चलन महाग झाल्यामुळे परदेशात शिक्षण घेणे किंवा पर्यटनासाठी जाणे अधिक खर्चिक ठरणार आहे. तसेच मोबाईल, संगणक आणि इतर आयात केलेल्या उपकरणांच्या किमती वाढण्याची शक्यता आहे, कारण त्यासाठी देयके परकीय चलनात करावी लागतात. चलनाच्या किमतीतील बदल हा परकीय चलन साठा, आयात-निर्यात संतुलन आणि जागतिक परिस्थिती यावर अवलंबून असतो. देशाकडे पुरेसा परकीय चलन साठा असल्यास चलन स्थिर राहते; मात्र साठ्यात घट झाल्यास चलन कमजोर होण्याची शक्यता वाढते.