लखनऊचा मुकुल ठरला विजयाचा शिल्पकार

मुकुल चौधरी नाबाद 54 आणि आयुष बडोनी 54 यांनी झळकविलेल्या धमाकेदार अर्धशतकांमुळे लखनऊ सुपर जायंट्सने कोलकाता नाईट रायडर्स (केकेआर) संघाचा तीन गडी राखून पराभव केला. गुरुवारी ईडन गार्डन्सवर खेळल्या गेलेल्या या सामन्यात, नाणेफेक गमावून प्रथम फलंदाजी करण्याचा निर्णय घेतल्यानंतर कोलकाताने 20 षटकांत चार बाद 181 धावा केल्या. प्रत्युत्तरात, लखनौने 20 षटकांतच सात गडी गमावून 182 धावा केल्या आणि सामना जिंकला. लखनऊचा हा सलग दुसरा विजय आहे. यापूर्वी त्यांनी हैदराबादविरुद्धचा सामना पाच गडी राखून जिंकला होता. या विजयामुळे लखनऊ गुणतालिकेत पाचव्या स्थानावर पोहोचले आहे. त्यांचे चार गुण असून नेट रन रेट -0.359 आहे. दुसरीकडे, कोलकाता सलग तीन पराभव आणि एका बरोबरीनंतर -1.315 च्या नेट रन रेटसह गुणतालिकेत नवव्या स्थानावर आहे. आयपीएल 2026 च्या गुणतालिकेवर राजस्थान रॉयल्सचे वर्चस्व आहे. 182 धावांचे लक्ष्य गाठताना, 16 व्या षटकाच्या अखेरीस लखनऊची धावसंख्या सात बाद 128 होती. आवेश खान (0) आणि मुकुल चौधरी (2) खेळपट्टीवर होते. 17 व्या षटकात सामन्यात पुन्हा रंगत आली. लखनऊने केकेआरच्या हातून विजय कसा हिसकावून घेतला, हे जाणून घेऊया. कर्णधार अजिंक्य रहाणेने चेंडू वैभव अरोराकडे सोपवला. पहिले दोन चेंडू निर्धाव गेले, पण मुकुलने तिसर्‍या चेंडूवर चौकार मारला. त्यानंतर त्याने हेलिकॉप्टर शॉट मारून एक शानदार षटकार ठोकला. या षटकात एकूण 11 धावा झाल्या. आवेश खान शून्यावर तर मुकुल चौधरी 13 धावांवर खेळपट्टीवर कायम होते. कार्तिक त्यागीच्या षटकात मुकुल चौधरीने आपला खरा रंग दाखवला. त्याने षटकाच्या अगदी पहिल्याच चेंडूवर एक लांब षटकार ठोकला. त्यानंतर काही निर्धाव चेंडू टाकले गेले, पण मग त्याने आणखी एक मोठा षटकार मारून केकेआरवर दबाव आणला. या षटकात 13 धावा निघाल्या आणि सामना पुन्हा चुरशीचा झाला. कर्णधार रहाणेने चेंडू कॅमेरॉन ग्रीनकडे सोपवला. लखनऊला आता 12 चेंडूंमध्ये 30 धावांची गरज होती. पहिल्या चेंडूवर मुकुलने पुल शॉट मारण्याचा प्रयत्न केला, पण चेंडू फार दूर गेला नाही. एकही धाव झाली नाही. आता 11 चेंडूंमध्ये 30 धावांची गरज होती.  दुसर्‍या चेंडूवर मुकुलचा फटका मारण्याचा प्रयत्न फसला व चेंडू हुकला. आता 10 चेंडूंमध्ये 30 धावांची गरज होती. तिसरा चेंडू मुकुलने एक शानदार षटकार मारला. 9 चेंडूंमध्ये 24 धावांची गरज होती. चौथा चेंडू मुकुलने मोठा फटका मारण्याचा प्रयत्न केला पण तो चुकला. आठ चेंडूंमध्ये 24 धावांची गरज असताना पाचव्या चेंडूवर मुकुलने एक शानदार चौकार मारला. आता सात चेंडूंमध्ये 20 धावांची गरज होती. सहाव्या चेंडूवर मुकुलने षटकार मारला. आता सहा चेंडूंमध्ये 14 धावांची गरज होती. आता शेवटच्या सहा चेंडूंमध्ये 14 धावांची गरज होती. चेंडू पुन्हा वैभव अरोराकडे सोपवण्यात आला. पहिला चेंडू आवेशने एक धाव घेतली. आता पाच चेंडूंमध्ये 13 धावांची गरज होती गरज असतांना दुसर्‍या चेंडूवर मुकुलने एक शानदार षटकार मारला. आता चार चेंडूंमध्ये सात धावांची गरज होती. तिसरा चेंडू  मुकुलला यॉर्कर होता व तो चुकला. आता तीन चेंडूंमध्ये सात धावांची गरज होती. चौथा चेंडू मुकुल पुन्हा यॉर्कर व तो पुन्हा चुकला. आता दोन चेंडूंमध्ये सात धावांची गरज होती. पाचवा चेंडू मुकुलने कव्हरवरून फटका मारून षटकार खेचला व धावसंख्या बरोबर केली आणि आपले अर्धशतकही पूर्ण केले. आता एका चेंडूत एका धावेची गरज होती. सहाव्या चेंडूवर बायमुळे एक धाव मिळाली आणि लखनऊने 182 धावा करून सामना जिंकला.
तत्पूर्वी, मिचेल मार्श आणि एडन मार्करम यांनी लखनऊला स्थिर सुरुवात करून दिली. त्यांनी 4.1 षटकांत पहिल्या विकेटसाठी 41 धावा जोडल्या. मार्श 11 चेंडूंमध्ये 15 धावा करून बाद झाला. मात्र, मार्करमला या चांगल्या सुरुवातीचा फायदा उचलता आला नाही आणि 15 चेंडूंमध्ये 22 धावा करून तो वैभव अरोराच्या गोलंदाजीवर बाद झाला. वैभवने तीन चेंडूंच्या आत एलएसजीच्या दोन्ही सलामीवीरांना बाद केले. कर्णधार रिषभ पंत फलंदाजीत चांगली कामगिरी करू शकला नाही आणि नऊ चेंडूंमध्ये 10 धावा करून बाद झाला. निकोलस पूरनची निराशाजनक कामगिरी या सामन्यातही कायम राहिली, त्याने 15 चेंडूंचा सामना करून केवळ 13 धावा केल्या. अब्दुल समद केवळ दोन धावांवर अनुकूल रॉयच्या गोलंदाजीवर त्रिफळाचीत झाला. मात्र, आयुष बडोनीने एक बाजू सांभाळत शानदार फलंदाजी केली आणि अर्धशतक झळकविले. बदोनीने 34 चेंडूंमध्ये 54 धावा केल्या. त्याने आपल्या खेळीत सात चौकार आणि दोन षटकार मारले. शेवटच्या षटकांमध्ये, एलएसजीचा 21 वर्षीय फलंदाज मुकुल चौधरीने शानदार फलंदाजी करत अवघ्या 27 चेंडूंमध्ये नाबाद 54 धावा केल्या आणि लखनऊ सुपर जायंट्सला एक संस्मरणीय विजय मिळवून दिला. मुकुलने आपल्या खेळीत दोन चौकार आणि सात षटकार मारले. शेवटच्या षटकात एलएसजीला विजयासाठी 14 धावांची गरज होती. मुकुलने वैभव अरोराच्या याच षटकात दोन षटकार मारून केकेआरच्या विजयाच्या आशा धुळीस मिळवल्या. गोलंदाजीत, केकेआरसाठी वैभव अरोरा आणि अनुकूल रॉय यांनी प्रत्येकी दोन बळी घेतले. सुनिल नारायण आणि कॅमेरॉन ग्रीन यांनी प्रत्येकी एक बळी घेतला. त्याअगोदार, नाणेफेक हरल्यानंतर प्रथम फलंदाजी करताना, कोलकाताने 20 षटकांत 181 धावा केल्या. फिल लन फलंदाजीत चांगली कामगिरी करू शकला नाही आणि केवळ नऊ धावांवर बाद झाला. तथापि, अजिंक्य रहाणे आणि अंगक्रिश रघुवंशी यांनी शानदार फलंदाजी करत 52 चेंडूंमध्ये दुसर्‍या विकेटसाठी 84 धावांची महत्त्वपूर्ण भागीदारी रचली. रहाणेने 24 चेंडूंमध्ये 41 धावा केल्या, तर अंगक्रिशने 33 चेंडूंमध्ये 45 धावा केल्या. रिंकू सिंग केवळ चार धावांवर बाद झाला. मात्र, त्यानंतर कॅमेरॉन ग्रीन आणि रोवमन पॉवेल यांनी सूत्रे हाती घेतली आणि 40 चेंडूंमध्ये पाचव्या विकेटसाठी 70 धावांची अभेद्य भागीदारी रचली. ग्रीनने तीन चौकार आणि एका षटकारासह 24 चेंडूंमध्ये 32 धावा करून नाबाद राहिला. तर, पॉवेलने चार चौकार आणि दोन षटकारांसह 24 चेंडूंमध्ये नाबाद 39 धावा केल्या. गोलंदाजीमध्ये एलएसजीकडून दिग्वेश राठी, आवेश खान, प्रिन्स यादव आणि सिद्धार्थ यांनी प्रत्येकी एक बळी घेतला. या पराभवाने केकेआरचे प्ले ऑफचे स्वप्न अंधुक झाले असून लखनऊच्या आशा मात्र पल्लवीत झाल्या आहेत.

मुकुलने मारलेल्या षटकाराची रंगली चर्चा
आयपीएल स्पर्धेने आंतरराष्ट्रीय क्रिकेटला अनेक स्टार खेळाडू दिले आहेत. आता या यादीत आणखी एक नाव जोडले गेले आहे. कोलकाता नाईट रायडर्स आणि लखनऊ सुपर जायंट्स यांच्यादरम्यान झालेल्या सामन्यात जेव्हा सर्वकाही संपले आहे असे वाटले होते तेव्हा मुकुल चौधरी नावाचे वादळ कोलकात्यातील इडन गार्डन्सच्या मैदानावर घोंगावल. 21 वर्षीय मुकुल चौधरीने कोलकाता नाईट रायडर्स संघातील गोलंदाजांची चांगलीच धुलाई केली. त्याने नाबाद 54 धावांची खेळी करुन लखनऊला 3 गडी राखून दमदार विजय मिळवून दिला. यादरम्यान त्याने शेवटच्या षटकात मारलेल्या शॉटची जोरदार चर्चा रंगली आहे. मुकुल चौधरी 13 व्या षटकात फलंदाजी करण्यासाठी आला. सुरूवातीच्या 8 चेंडूंमध्ये त्याला अवघ्या 2 धावा करता आल्या होत्या. शेवटी लखनऊ सुपर जायंट्स संघाला 4 षटकात 52 धावांची गरज होती. संघातील 7 प्रमुख फलंदाज माघारी परतले होते. त्यामुळे सामना जवळजवळ संपल्यात जमा होता. पण त्यानंतर त्याने बॅट फिरवायला सुरुवात केली आणि मग शेवटपर्यंत थांबला नाही.

डॉ.दत्ता विघावे
मो : 9096372082