अजितदादांच्या विमान अपघातावर अनेक शंका

आमदार रोहित पवारांकडून डीजीसीएकडे सखोल चौकशीची मागणी
मुंबई ः बारामती येथे घडलेल्या विमान अपघातात ज्येष्ठ नेते अजित पवार यांच्या दुर्दैवी निधनानंतर राज्याच्या राजकीय वर्तुळात अनेक प्रश्‍न उपस्थित होत आहेत. या पार्श्‍वभूमीवर राष्ट्रवादी काँग्रेस (शरदचंद्र पवार गट)चे आमदार रोहित पवार यांनी या घटनेची वस्तुनिष्ठ आणि निष्पक्ष चौकशी व्हावी, अशी मागणी केली आहे. त्यांनी या संदर्भात केंद्रीय गृहमंत्री अमित शहा, नागरी उड्डाण मंत्री के. राममोहन नायडू तसेच नागरी विमान वाहतूक महासंचालनालय (डीजीसीए) यांना ईमेलद्वारे निवेदन पाठवले आहे.
28 जानेवारी रोजी बारामती येथे झालेल्या या विमान अपघातात अजित पवार यांचे निधन झाले. या घटनेनंतर विविध स्तरांवर शंका-कुशंका व्यक्त होत असून, अपघाताच्या कारणांबाबत स्पष्ट माहिती अद्याप समोर आलेली नाही. तपासाची गती अपेक्षेइतकी वेगवान नसल्याची भावना व्यक्त करत रोहित पवार यांनी या प्रकरणात पारदर्शकता आवश्यक असल्याचे नमूद केले आहे. रोहित पवार यांनी पत्रकार परिषदांच्या माध्यमातून अपघातासंदर्भातील काही मुद्दे आणि शंका सार्वजनिक केल्या. त्यांच्या मते, या अपघातामागील तांत्रिक, प्रशासकीय किंवा इतर कोणतेही घटक स्पष्टपणे समोर यायला हवेत. त्यांनी संबंधित केंद्रीय मंत्र्यांची प्रत्यक्ष भेट घेण्याचा प्रयत्न केला होता; मात्र वेळ न मिळाल्याने त्यांनी सविस्तर सादरीकरणासह आपले प्रश्‍न ईमेलद्वारे पाठवले. आपल्या निवेदनात त्यांनी नमूद केले आहे की, अपघातासंदर्भातील सर्व बाबींची सखोल चौकशी करून वस्तुस्थिती जनतेसमोर मांडली जावी. अशा चौकशीमुळे केवळ एका नेत्याच्या निधनामागील कारणांचा उलगडा होणार नाही, तर भविष्यात अशा घटना टाळण्यासाठी आवश्यक उपाययोजनाही निश्‍चित करता येतील. या प्रकरणामुळे राजकीय वातावरणात अस्वस्थता निर्माण झाली आहे. अपघाताची तांत्रिक तपासणी, विमानाची स्थिती, हवामानाचा प्रभाव, तसेच उड्डाणासंबंधी परवानग्या आणि नियमांचे पालन यासारख्या मुद्द्यांवर स्पष्ट अहवाल प्रसिद्ध होणे आवश्यक असल्याचे मत व्यक्त केले जात आहे.