पाकिस्तानी मालवाहू विमान बेपत्ताअरबी समुद्रात शोधमोहीम; चालक दलातील पाच जणांचा समावेश

इस्लामाबाद : पाकिस्तानातील कराचीकडे जात असलेले एक मालवाहू विमान मंगळवारी रात्री अचानक बेपत्ता झाल्याने खळबळ उडाली आहे. विमानाचा हवाई संपर्क आणि रडारवरील नोंद एकाचवेळी तुटल्यानंतर पाकिस्तानच्या विमानतळ प्रशासनाने तातडीने शोध आणि बचाव मोहीम सुरू केली. विमानात चालक दलातील पाच सदस्य असल्याची माहिती अधिकृत सूत्रांनी दिली आहे.
पाकिस्तानच्या विमानतळ प्रशासनाने दिलेल्या माहितीनुसार, संबंधित मालवाहू विमानाने रात्री सुमारे नऊ वाजून अठरा मिनिटांनी आपल्या मार्गदर्शन प्रणालीमध्ये तांत्रिक अडचण निर्माण झाल्याचा संदेश दिला होता. ही माहिती मिळताच कराची येथील हवाई नियंत्रण केंद्राकडून विमानाच्या चालकांशी संपर्क साधून आवश्यक सूचना देण्यात आल्या. मात्र काही मिनिटांतच परिस्थिती अधिक गंभीर बनली. रात्री सुमारे नऊ वाजून बावीस मिनिटांनी रडारवरील नोंदीनुसार विमानाची उंची झपाट्याने कमी होत असल्याचे दिसून आले. याच काळात विमानाने नियोजित मार्ग बदलल्याचेही स्पष्ट झाले. त्यानंतर कराचीच्या पश्‍चिमेस सुमारे 155 सागरी मैल अंतरावर विमानाचा रडारवरील मागोवा आणि संचार संपर्क पूर्णपणे तुटला. या घटनेनंतर तातडीने बचाव समन्वय केंद्र कार्यान्वित करण्यात आले. नौदल, किनाररक्षक दल तसेच इतर शासकीय यंत्रणांच्या मदतीने अरबी समुद्रात व्यापक शोधमोहीम हाती घेण्यात आली आहे. समुद्रातील विविध भागांत शोधकार्य सुरू असून विमानाचा किंवा त्यातील सदस्यांचा अद्याप कोणताही ठोस मागमूस लागलेला नाही.