प्रलंबित मागण्यांसाठी आज परिचारिकांचा मोर्चा

मुंबई: पहिल्या, दुसर्‍या कालबद्ध पदोन्नतीचा मोबदला पूर्वलक्षी प्रभावाने तात्काळ द्यावा, सर्व संवर्गाची रिक्त पदे त्वरित भरावी, सार्वजनिक आरोग्य परिचारिका, सहाय्यक परिचारिका प्रसविका, समन्वयक, आया कमर्चार्‍यांसाठी रजा राखीव पदे तात्काळ निर्माण करावी, डॉक्टरांच्या उपस्थितीविना नियमित लसीकरण कार्यक्रमाची सक्ती करू नये, आदी विविध मागण्यांसाठी जागतिक परिचारिका दिनी, 12 मे 2023 रोजी दुपारी 2 वाजता कुटुंब कल्याण व माता बाल संगोपन विभागातील सहाय्यक परिचारिका प्रसविका आणि सार्वजनिक आरोग्य परिचारिका मुंबई महानगरपालिकेच्या एफ दक्षिण विभाग कार्यालयातील कार्यकारी आरोग्य अधिकार्‍यांच्या कार्यालयावर मोर्चा काढणार आहेत.
कुटुंब कल्याण व माता बाल संगोपन विभागातील सहाय्यक परिचारिका प्रसविका आणि सार्वजनिक आरोग्य परिचारिका यांचे विविध प्रश्‍न आणि मागण्या मागील अनेक महिन्यांपासून दि म्युनिसिपल युनियनच्या माध्यमातून प्रशासनासमोर मांडण्यात येत आहेत. मात्र त्यांच्या मागण्या आणि प्रश्‍न सोडविण्याबाबत प्रशासन अनास्था दाखवत आहे. त्यामुळे परिचारिकांना प्रचंड अडचणींना सामोरे जावे लागत आहे. परिणामी, परिचारिकांमध्ये असंतोष धगधगू लागला आहे. या सर्व मागण्यांची पूर्तता व्हावी यासाठी परिचारिका दिनाचे औचित्य साधून 12 मे 2023 रोजी दुपारी 2 वाजता मुंबई महानगरपालिकेच्या एफ-दक्षिण विभाग कार्यालयातील कार्यकारी आरोग्य अधिकार्‍यांच्या कार्यालयावर लक्षवेधी मोर्चा काढण्यात येणार आहे. सकारात्मक निर्णय न झाल्यास, होणार्‍या सभेमध्ये पुढील आंदोलनाची दिशा निश्‍चित करण्यात येणार असल्याची माहिती दि म्युनिसिपल युनियन सरचिटणीस रमाकांत बने यांनी दिली.