तीन वरिष्ठ पोलिस निरीक्षकांना आयुक्तांचा दणका

पुणे / प्रतिनिधीः कर्तव्यात कसूर केल्याचा ठपका ठेवून तीन वरिष्ठ निरीक्षकांना पोलिस आयुक्तांनी चांगलाच दणका दिला आहे. संबंधित वरिष्ठ पोलिस निरीक्षकांना एक वर्ष वेतनवाढ आणि सक्त ताकीदची शिक्षा पोलिस आयुक्त अमिताभ गुप्ता यांनी सुनावली आहे. दोन निरीक्षकांना अवैध धंद्यांबाबत आणि एका निरीक्षकाला तपास व्यवस्थित न केल्याबद्दल सक्त ताकीद देण्यात आली आहे. क्रांतीकुमार पाटील, अशोक कदम आणि अजित लकडे अशी शिक्षा सुनावलेल्या वरिष्ठ पोलिस निरीक्षकांची नावे आहेत. पोलिस आयुक्तांनी थेट वरिष्ठ निरीक्षकांना शिक्षा सुनावल्यामुळे पोलिस दलात खळबळ उडाली आहे. याद्वारे पोलिस आयुक्तांनी सर्व पोलिस ठाण्यांच्या प्रमुखांना चांगले काम करण्याच्या सूचना दिल्या आहेत. 

पाटील वानवडी पोलिस ठाण्याचे वरिष्ठ पोलिस निरीक्षक असताना डिसेंबर 2020मध्ये बेटिंगबाबत छापा टाकण्यात आला होता. याप्रकरणी कोंढवा पोलिस ठाण्यात पाच जणांच्या विरोधात गुन्हा दाखल केला होता. या गुन्ह्यातील आरोपी मनीष अजवानी याच्या मोबाइल क्रमांकाचा सीडीआर काढला असता, पाटील छापा टाकण्यापूर्वी आरोपीसोबत बोलल्याचे निष्पन्न झाले. या पूर्वीही त्यांचे तेरा वेळा आरोपीशी फोनवर बोलणे झाल्याचे दिसून आले. पाटील यांचे हे वर्तन बेजबाबदार असून, त्यांनी पोलिसदलाची शिस्त धोक्यात आणल्याचा ठपका ठेवण्यात आला. त्यामुळे त्यांची एक वर्षाची पगारवाढ रोखण्याची शिक्षा सुनावण्यात आली. लष्कर पोलिस ठाण्याच्या हद्दीत यंदा जानेवारीमध्ये गुन्हे शाखेच्या पथकाने जुगार अड्ड्यावर छापा टाकून कारवाई केली. या ठिकाणी जुगार खेळताना 62 जणांना पकडण्यात आले होते. त्या वेळी लष्कर पोलिस ठाण्याचे सहायक निरीक्षक राजेश सोनवणे तेथे गेले. पोलिस ठाण्याची संयुक्त कारवाई दाखवून मोठी कारवाई करू नका, असे त्यांनी आपल्या सहकार्‍यांना बजावले. त्यामुळे या जुगार अड्ड्याची माहिती सोनवणे यांना असल्याचे उघड झाले. लष्कर पोलिस ठाण्याच्या हद्दीतील अवैध धंद्यांचे उच्चाटन करण्याच्या सूचना असूनही वरिष्ठ निरीक्षक अशोक कदम यांनी त्याकडे दुर्लक्ष केले. त्यामुळे त्यांची एक वर्ष पगारवाढ रोखण्याची शिक्षा सुनावण्यात आली. वरिष्ठ निरीक्षक अजित लकडे नगर जिल्ह्यातील शेवगाव पोलिस ठाण्यात नेमणुकीला असताना त्यांनी ’महाराष्ट्र संघटित गुन्हेगारी प्रतिबंधक’ कायद्यानुसार (मोक्का) दाखल गुन्ह्याचा तपास आणि दोषारोपपत्र दाखल करताना निष्काळजीपणा केल्याचे आढळून आले. त्यामुळे त्यांची चौकशी करून पोलिस आयुक्तांनी त्यांना सक्त ताकीद दिली.