राज्यात पुढील 5 दिवस मुसळधार पावसाचे

मुंबई : गेल्या काही दिवसांपासून दडी मारून बसलेला पाऊस पुन्हा एकदा सक्रिय होणार आहे. त्यातच राज्यातल्या काही भागात पावसानं चांगलीच हजेरी लावली आहे. येत्या तीन दिवसात राज्यात मुसळधार पाऊस कोसळणार असल्याचा अंदाज वर्तवण्यात आला आहे. कोकण, मराठवाडा आणि मध्य महाराष्ट्रासह विदर्भात पावसाचा जोर जास्त असण्याची शक्यता वर्तवण्यात आली आहे. तर मुंबई आणि नागपूर या भागातही पुढील 5 दिवस मुसळधार पाऊस कोसळणार असल्याचा अंदाज वर्तवला आहे. पुढच्या पाच दिवसांमध्ये राज्याच्या काही जिल्ह्यांना ऑरेंज तर काही जिल्ह्यांना येलो अलर्ट देण्यात आला आहे.
दक्षिण महाराष्ट्र, उत्तर महाराष्ट्र, कोकण, मराठवाडा, विदर्भामध्ये येलो अलर्ट देण्यात आला आहे तर मध्य महाराष्ट्रातही विजांच्या कडकडाटासह पावसाचा इशारा देण्यात आला. हवामान खात्याकडून पुढचे पाच दिवस पाऊस राहील अशी माहिती आहे. त्यामुळे शेतकर्‍यांनी आणि नागरिकांनी पावसाचा अंदाज घेत घराबाहेर पडण्याच्या सूचना आहेत. दक्षिण कोकणात मुसळधार पावसाचा इशारा तर उत्तर कोकण, मध्य महाराष्ट्रात तुरळक ठिकाणी जोरदार पाऊस हजेरी लावेल. उर्वरित राज्यात विजांच्या कडकडाटासह पावसाचा अंदाज आहे. कोकणातील रत्नागिरी, सिंधुदूर्ग जिल्ह्यामध्ये पावसाचा जोर पाहायला मिळेल. त्यामुळे इथल्या नागरिकांना सतर्क राहण्याचा इशारा देण्यात आला आहे. ठाणे, पालघर, मुंबई, रायगड, मध्य महाराष्ट्र, मराठवाडा, विदर्भ या भागांना यलो अलर्ट देण्यात आला आहे. मराठवाड्यातील औरंगाबाद, जालना, बीड, उस्मानाबाद, लातूर, परभणी, नांदेड, हिंगोली इथे सध्या जोरदार पाऊस सुरू आहे, अशात पावसाचा जोर आणखी वाढण्याची शक्यता हवामान खात्याकडून वर्तविण्यात आली आहे.

‘या’ जिल्ह्यात विजांसह पावसाचा इशारा
मध्य महाराष्ट्रातील नंदूरबार, धुळे, जळगाव, अहमदनगर तर मराठवाड्यातील औरंगाबाद, जालना, बीड, उस्मानाबाद, लातूर, परभणी, नांदेड, हिंगोली आणि विदर्भातल्या बुलडाणा, अकोला, वाशीम, अमरावती, वर्धा, नागपूर, भंडारा, गोंदिया, चंद्रपूर, यवतमाळ, गडचिरोली जिल्ह्यात विजांसह जोरदार पावसाचा इशारा दिला आहे.