अकोले नगराध्यक्षपदाची आज निवडणूक; भाजपतील दुही समोर, माजी आमदार पिचडांच्या नेतृत्वाची अग्निपरीक्षा

अकोले: अकोले नगरपंचायतीच्या नगराध्यक्षपदाच्या निवडणुकीमुळे तालुक्यातील राजकीय वातावरण चांगलेच तापले आहे. अर्ज माघारीनंतर नगराध्यक्षपदासाठी वैष्णवी सोमेश्वर धुमाळ आणि सोनाली लक्ष्मीकांत नाईकवाडी यांच्यात थेट लढत निश्चित झाली आहे. त्यामुळे आज शुक्रवारी (३१ जुलै) होणाऱ्या निवडणुकीकडे संपूर्ण तालुक्याचे लक्ष लागले आहे.

पीठासीन अधिकारी अरुण उंडे यांनी अंतिम उमेदवारांची यादी जाहीर केल्यानंतर निवडणुकीचे चित्र स्पष्ट झाले. सुरुवातीला चौरंगी लढतीची शक्यता व्यक्त केली जात होती. मात्र, अर्ज माघारीनंतर केवळ दोन उमेदवार रिंगणात राहिल्याने निवडणूक दुरंगी झाली आहे.

नगराध्यक्षपदाचे आरक्षण सर्वसाधारण प्रवर्गासाठी असले, तरी दोन्ही प्रमुख उमेदवार महिला आहेत. वैष्णवी धुमाळ यांना भाजपची अधिकृत उमेदवारी देण्यात आली असून, सोनाली नाईकवाडी यांनी अपक्ष म्हणून उमेदवारी कायम ठेवत स्वतंत्र शक्तिप्रदर्शन केले आहे. त्यामुळे भाजपमधील अंतर्गत मतभेदही या निवडणुकीच्या निमित्ताने चव्हाट्यावर आल्याची जोरदार चर्चा सुरू आहे.

राजकीय वर्तुळात सुरू असलेल्या चर्चेनुसार, १७ सदस्यांच्या नगरपंचायतीत सुमारे १२ नगरसेवकांचा पाठिंबा सोनाली नाईकवाडी यांना असल्याचा दावा केला जात आहे. तर वैष्णवी धुमाळ यांच्या बाजूने भाजपचे अधिकृत पाच नगरसेवक असून, काही अन्य सदस्यांचा पाठिंबा मिळण्याची शक्यता व्यक्त केली जात आहे. मात्र, या संख्याबळाच्या दाव्यांची अधिकृत पुष्टी झालेली नाही.

आज ३१ जुलै रोजी होणाऱ्या या निवडणुकीचा निकाल केवळ नगराध्यक्षपदाचा निर्णय करणार नाही, तर अकोले तालुक्यातील पुढील राजकीय समीकरणांवरही त्याचा मोठा परिणाम होणार असल्याचे मानले जात आहे. विशेषतः हा निकाल माजी आमदार वैभवराव पिचड यांच्या राजकीय नेतृत्वाच्या दृष्टीनेही अत्यंत महत्त्वाचा मानला जात असून, अंतिम चित्र मतदान आणि निकालानंतरच स्पष्ट होणार आहे.