लिंडा नोस्कोव्हाची विम्बल्डनची नवी सम्राज्ञीकॅरोलिना मुचोव्हावर तीन सेटमध्ये मात; चेक महिला टेनिसचे वर्चस्व पुन्हा अधोरेखित

लंडन : अवघ्या 21 वर्षांच्या लिंडा नोस्कोव्हाने विम्बल्डन महिला एकेरी स्पर्धेचे विजेतेपद पटकावत आपल्या कारकिर्दीतील पहिले ग्रँडस्लॅम विजेतेपद मिळवले. अंतिम फेरीत तिने सहकारी चेक खेळाडू कॅरोलिना मुचोव्हाचा 6-2, 5-7, 6-3 असा पराभव करत प्रतिष्ठेची ‘व्हीनस रोझवॉटर डिश’ आपल्या नावावर केली. तीन सेटपर्यंत रंगलेल्या या लढतीत नोस्कोव्हाने संयम, जिद्द आणि आत्मविश्‍वासाच्या जोरावर ऐतिहासिक यश संपादन केले.
सामन्याच्या सुरुवातीपासूनच नोस्कोव्हाने आक्रमक खेळाचे प्रदर्शन केले. पहिल्या सेटमध्ये तिने प्रतिस्पर्धीवर पूर्ण वर्चस्व राखत 6-2 अशी सहज आघाडी घेतली. दुसर्‍या सेटमध्येही ती विजयाच्या उंबरठ्यावर पोहोचली होती. मात्र, सलग पाच विजयबिंदू गमावल्यामुळे मुचोव्हाला पुनरागमनाची संधी मिळाली आणि तिने हा सेट 7-5 असा जिंकत सामना निर्णायक तिसर्‍या सेटमध्ये नेला. निर्णायक सेटमध्ये मात्र नोस्कोव्हाने कोणतीही चूक न करता आपल्या खेळात सातत्य राखले. अचूक फटके, दमदार सर्व्हिस आणि मानसिक स्थैर्याच्या जोरावर तिने तिसरा सेट 6-3 असा जिंकत पहिलेच ग्रँडस्लॅम विजेतेपद आपल्या नावावर केले. या विजयासह लिंडा नोस्कोव्हा गेल्या चार वर्षांत विम्बल्डन महिला एकेरीचे विजेतेपद मिळवणारी तिसरी चेक खेळाडू ठरली आहे. यापूर्वी मार्केटा वोंद्रोसोव्हा हिने 2023 मध्ये, तर बार्बोरा क्रेजकोव्हा हिने 2024 मध्ये हा मान मिळवला होता. त्यामुळे महिला टेनिसमध्ये चेक प्रजासत्ताकाचे सातत्यपूर्ण वर्चस्व पुन्हा एकदा अधोरेखित झाले आहे. अंतिम सामन्याला अनेक दिग्गज खेळाडू उपस्थित होते. दोन वेळा विम्बल्डन विजेती पेट्रा क्विटोव्हा तसेच विक्रमी नऊ वेळा महिला एकेरीचे विजेतेपद पटकावणार्‍या मार्टिना नवरातिलोवा यांनी हा सामना प्रत्यक्ष पाहिला. नवरातिलोवा या प्रिन्सेस ऑफ वेल्स केट यांच्या शेजारी विशेष आसनव्यवस्थेत उपस्थित होत्या. सामन्यानंतर प्रिन्सेस ऑफ वेल्स यांनी लिंडा नोस्कोव्हाला विजेतेपदाची मानाची ट्रॉफी प्रदान केली. विशेष म्हणजे, लिंडा नोस्कोव्हा आणि कॅरोलिना मुचोव्हा यांनी 2024 मधील पॅरिस ऑलिम्पिकमध्ये महिला दुहेरी स्पर्धेत एकत्र खेळत चौथे स्थान मिळवले होते. त्याच दोन खेळाडू यावेळी विम्बल्डनच्या अंतिम फेरीत एकमेकींसमोर उभ्या ठाकल्या. मैत्री आणि सहकार्‍यांचे नाते बाजूला ठेवत झालेल्या या लढतीत अखेर नोस्कोव्हाने सरशी साधली आणि आपल्या कारकिर्दीतील सर्वात मोठे यश संपादन केले. या विजयानंतर लिंडा नोस्कोव्हा ही जागतिक महिला टेनिसमधील नव्या दमाच्या आणि भविष्यातील आघाडीच्या खेळाडूंपैकी एक म्हणून अधिक ठळकपणे समोर आली आहे. तिच्या या यशामुळे चेक महिला टेनिसची समृद्ध परंपरा आणखी बळकट झाल्याचे मानले जात आहे.