फास्टॅग वार्षिक पास 1 एप्रिलपासून महागणार

नवी दिल्ली : देशातील राष्ट्रीय महामार्गांवर नियमित प्रवास करणार्‍या वाहनधारकांना पुढील महिन्यापासून थोडा अधिक खर्च करावा लागणार आहे. केंद्र सरकारच्या रस्ते वाहतूक व महामार्ग विभागाने फास्टॅग वार्षिक टोल पासच्या दरात वाढ करण्याचा निर्णय घेतला आहे. या निर्णयानुसार सध्या तीन हजार रुपयांना मिळणारा वार्षिक पास 1 एप्रिलपासून तीन हजार पंच्याहत्तर रुपयांना उपलब्ध होणार आहे. म्हणजेच या पासच्या दरात सुमारे अडीच टक्के वाढ करण्यात आली आहे.
हा पास प्रामुख्याने कारधारकांसाठी उपलब्ध असून त्याद्वारे देशातील निवडक टोल नाक्यांवर थांबण्याची गरज न पडता थेट प्रवास करता येतो. वाहनांवरील इलेक्ट्रॉनिक टोल प्रणालीमुळे व्यवहार जलद आणि रोखरहित पद्धतीने पूर्ण होतात. मंत्रालयाच्या माहितीनुसार या योजनेच्या अधिसूचनेत दरवर्षी दरांचे पुनरावलोकन करण्याची तरतूद आधीपासूनच करण्यात आली होती. त्यानुसारच यंदा वार्षिक आढावा घेतल्यानंतर दरवाढ लागू करण्यात आली आहे. महामार्गांवरील टोल दर निश्‍चित करण्यासाठी वापरल्या जाणार्‍या सूत्राच्या आधारे ही वाढ करण्यात आल्याचेही अधिकार्‍यांनी स्पष्ट केले. हा विशेष वार्षिक पास मागील वर्षी स्वातंत्र्यदिनाच्या निमित्ताने सुरू करण्यात आला होता. सुरुवातीपासूनच वाहनचालकांकडून या योजनेला चांगला प्रतिसाद मिळाला आहे. आतापर्यंत देशभरातील सुमारे बावन्न लाखांहून अधिक वाहनधारकांनी या पासचा लाभ घेतल्याची माहिती देण्यात आली आहे. लांब पल्ल्याचा किंवा वारंवार प्रवास करणार्‍या वाहनधारकांसाठी हा पास किफायतशीर मानला जातो. कारण प्रत्येक टोल नाक्यावर वेगळा शुल्क भरण्याऐवजी वार्षिक पासमुळे प्रवास सुलभ होतो आणि वेळेचीही बचत होते. वाहनधारकांना जुन्या दरात पास घेण्याची संधी मात्र अद्याप उपलब्ध आहे. 31 मार्चपर्यंत पास नूतनीकरण किंवा नवीन खरेदी केल्यास तो तीन हजार रुपयांच्या जुन्या दरात मिळणार आहे. मात्र 1 एप्रिलपासून प्रणालीमध्ये नवे दर लागू होतील. सध्या देशातील सुमारे दोनशे प्रमुख टोल नाक्यांवर हा पास वैध आहे. भविष्यात या योजनेचा विस्तार करून आणखी टोल नाक्यांचा समावेश करण्याचेही सरकारचे उद्दिष्ट असल्याचे सांगितले जाते. यामुळे महामार्गांवरील प्रवास अधिक सुलभ होण्याची अपेक्षा व्यक्त केली जात आहे.