रागात पत्नीचे तुकडे करून हत्या

हरियाणा- पत्नीची निर्घृणपणे हत्या केल्याप्रकरणी एका 32 वर्षीय व्यक्तीला गुरुग्राम पोलिसांनी बेड्या ठोकल्या आहेत. काही दिवसांपूर्वी हरियाणातील गुरुग्राममध्ये या महिलेच्या मृतदेहाचे अर्धे जळालेले तुकडे सापडले होते. त्यानंतर परिसरात एकच खळबळ उडाली होती. पोलिसांनी या प्रकरणी महिलेच्या पतीविरुद्ध हत्या आणि पुरावे नष्ट केल्याच्या आरोपाखाली गुन्हा दाखल केला आहे. गुरुग्राम पोलिसांनी 21 एप्रिल रोजी मानेसर भागातील कुकडोला गावातील शेतात बांधलेल्या एका खोलीतून या महिलेचे अर्धे जळालेले धड जप्त केले होते. यानंतर काही दिवसांनी पोलिसांना तिचे हात आणि डोकेही सापडले होते. मृत महिलेच्या मृतदेहाचे तुकडे वेगवेगळ्या ठिकाणी आढळले होते. पोलिसांनी दिलेल्या माहितीनुसार, आरोपीने मृतदेहाची ओळख लपवण्यासाठी पुरेपूर प्रयत्न केला होता. पोलिसांनी याप्रकरणी जितेंद्र नावाच्या आरोपीला मानेसर येथून अटक केली आहे. जितेंद्र गांधी नगरचा रहिवासी असून मानेसर परिसरात भाड्याने राहत असल्याचे पोलिसांनी सांगितले. उमेद सिंग नावाच्या या गावकऱ्याने आपल्या शेतात बांधलेल्या खोलीतून धूर निघत असल्याने पोलिसांना याची माहिती दिली. मात्र घरात जाऊन पाहिले असता पोलिसांना अर्धे जळालेले धड पाहून धक्का बसला होता. कशामुळे झाली हत्या? जितेंद्रचे त्याच्या पत्नीवर खूप प्रेम होते. त्यांनी मानेसर येथे भाड्याने घर घेतले होते. जितेंद्र नौदलात होता मात्र त्याने नोकरी सोडली. त्यानंतर जितेंद्र दुसरीकडे काम करु लागला. मात्र घरातील छोट्या-छोट्या गोष्टींसाठी पत्नीला अनेकवेळा त्याच्यावर अवलंबून राहावे लागत होते. त्यानंतर हळुहळू पैशाच्या कमतरतेमुळे पत्नीने जितेंद्रला टोमणे मारण्यास सुरुवात केली. याचदरम्यान जितेंद्रचे दुसऱ्या महिलेसोबत प्रेमसंबंध सुरु झाले. त्यामुळे दोघांमधला वाद आणखीनच वाढला. आता त्याचा संयम सुटत चालला होता. एक वेळ अशी आली की त्याच्या संयमाचा बांध फुटला. त्याने पत्नीला कायमचे शांत करण्याचे ठरवले.