रंगनाथ महाराज संस्थान, मादळमोही येथे धर्मनाथ बीज उत्सव उत्साहात साजरा

बीड । प्रतिनिधी
गेवराई तालुक्यातील मादळमोही येथे नाथ संप्रदायातील रंगनाथ महाराजांची संजीवन समाधी आहे. रंगनाथ महाराज संस्थानच्या मठाधिपती हभप कृष्णा महाराज यांच्या मार्गदर्शनाखाली धर्मनाथ बीज सोहळा दि. 20 जानेवारी 2026, मंगळवार रोजी उत्साहात आयोजित करण्यात आला.
संस्थानाच्या संजीवन समाधीला अभिषेक करून मंदिर परिसरात फुलांनी आकर्षक सजावट करण्यात आली होती. सकाळी 9 वा. धर्मनाथ महाराजांच्या कथेला सुरुवात झाली, यावेळी भाविकांनी कथा श्रवणाचा लाभ घेतला. याशिवाय 7 कुंडी गायत्री महायज्ञ सोहळा गायत्री मातेला नमन करून सुरू झाला. दुपारी बारा वाजता नाथांची आरती केली गेली आणि भाविकांना महाप्रसादाचे वाटप करण्यात आले. कार्यक्रम मोठ्या उत्साहात पार पडला. प्रमुख उपस्थितीत माजी राज्यमंत्री बदामराव आबा पंडित, जिल्हा परिषद सदस्य बप्पासाहेब अण्णा तळेकर, तसेच सामाजिक व धार्मिक क्षेत्रातील मान्यवर उपस्थित होते. कार्यक्रमाचे आयोजक गायत्री परिवारातील सदस्य आणि भाविकांची मोठ्या संख्येने मंदिर परिसरात उपस्थिती होती.