सुनील मोरे आत्महत्या प्रकरणात प्राथमिक शिक्षणाधिकार्‍यांना सहआरोपी करून निलंबित करण्याची मागणीशिवसेना (उद्धव बाळासाहेब ठाकरे) पक्षाचे स्थानिक नेते प्रकाश मारावार यांचे शिक्षण संचालक, उपसंचालक व मुख्य कार्यकारी अधिकार्‍यांना निवेदन

नांदेड जिल्ह्यातील बहुचर्चित शिक्षक सुनील मोरे आत्महत्या प्रकरणात प्राथमिक शिक्षणाधिकारी वंदना फुटाणे यांना सहआरोपी करण्यात यावे तसेच त्यांना तात्काळ निलंबित करण्यात यावे, अशी मागणी शिवसेना (उद्धव बाळासाहेब ठाकरे) पक्षाचे स्थानिक नेते प्रकाश मारावार यांनी केली आहे. यासंदर्भात त्यांनी शिक्षण संचालक, शिक्षण उपसंचालक तसेच जिल्हा परिषदेचे मुख्य कार्यकारी अधिकारी महेश पाटील यांना निवेदन सादर केले.
निवेदनात मारावार यांनी म्हटले आहे की, नांदेड जिल्हा परिषद शिक्षण विभागात अनागोंदी कारभार, बेजबाबदार कार्यपद्धती आणि कथित आर्थिक देवाणघेवाणीमुळे विभागाची प्रतिमा मलिन होत आहे. आत्महत्याग्रस्त शिक्षक सुनील मोरे यांनी गेल्या वर्षभरात आपल्या अडचणी व तक्रारी प्राथमिक शिक्षणाधिकारी यांच्यासमोर वारंवार मांडल्या होत्या. मात्र, त्यावर तोडगा काढण्याऐवजी त्यांना कारणे दाखवा नोटीस देण्यात आली आणि निलंबनाची धमकी दिल्याचा आरोप त्यांनी केला आहे. गटशिक्षणाधिकारी आणि शिक्षक यांच्यातील वाद मिटविण्याऐवजी संबंधित प्रकरण अधिक चिघळण्यास प्राथमिक शिक्षणाधिकारी जबाबदार असल्याचा आरोपही मारावार यांनी निवेदनात केला आहे. त्यामुळे या प्रकरणाची सखोल चौकशी करून प्राथमिक शिक्षणाधिकारी यांना सहआरोपी करण्यात यावे व त्यांना तात्काळ निलंबित करण्यात यावे, अशी मागणी त्यांनी संबंधित अधिकार्‍यांकडे केली आहे.