अष्टपैलू खेळाडू मिचेल मार्श वर्ल्ड कप मधून अनिश्चित काळासाठी बाहेर

क्रिकेट वर्ल्ड कप 2023 च्या मध्यावरच ऑस्ट्रेलियाला मोठा धक्का बसला आहे. खरं तर, त्याचा फॉर्ममध्ये असलेला अष्टपैलू खेळाडू मिचेल मार्श मायदेशी परतला आहे. सध्या सुरू असलेल्या ICC क्रिकेट वर्ल्ड कप 2023 मधून अनिश्चित काळासाठी बाहेर पडला आहे. वैयक्तिक कारणांमुळे मार्श गुरुवारी भारतातून मायदेशी परतला आणि उर्वरित सामन्यांमध्ये त्याच्या सहभागाबाबत निश्चितता नाही.क्रिकेट ऑस्ट्रेलियाने एका निवेदनात म्हटले आहे की, त्याच्या संघात पुनरागमनाची टाइमलाइन निश्चित नाही. ऑस्ट्रेलियाला शनिवारी इंग्लंडविरुद्ध महत्त्वाचा वनडे सामना खेळायचा आहे. अष्टपैलू ग्लेन मॅक्सवेल गोल्फ कोर्सवर झालेल्या दुखापतीमुळे आधीच या सामन्यातून बाहेर आहे. मार्शच्या अनुपस्थितीमुळे ऑस्ट्रेलियन संघाचे टेन्शन आणखी वाढले आहे. ऑस्ट्रेलिया उपांत्य फेरी स्थान मिळवण्याचा प्रयत्न करत आहे. इंग्लंडनंतर ऑस्ट्रेलियाला 7 नोव्हेंबरला अफगाणिस्तान आणि 11 नोव्हेंबरला बांगलादेशशी सामना खेळायचा आहे.वर्ल्ड कपमध्ये मार्शच्या नावावर आतापर्यंत एकूण 225 धावा आणि दोन विकेट आहेत. बंगळुरूमध्ये पाकिस्तानविरुद्ध त्याने शानदार 121 धावा केल्या होत्या. अशा परिस्थितीत त्याच्या अनुपस्थितीचा ऑस्ट्रेलियन संघाच्या संतुलनावरही परिणाम होणार आहे. ट्रॅव्हिस हेडच्या अनुपस्थितीत ऑस्ट्रेलियाच्या सुरुवातीच्या सामन्यांमध्ये त्याने सलामी दिली.मार्शची जागा घेण्याचा पर्याय ऑस्ट्रेलियाकडे असला तरी मार्शला स्पर्धेतील उर्वरित सामने खेळता आले नाहीत, तर इव्हेंट टेक्निकल कमिटीच्या परवानगीनंतर ते दुसऱ्या खेळाडूला संघात आणू शकतात.