किल्ले प्रतापगडावर शिवजयंती उत्साहात साजरी

महिला बालकल्याण मंत्री यशोमती ठाकूर उपस्थित: चौथ्या महिला धोरणाची प्रत शिव चरणी अर्पण
पाचगणी / वार्ताहर : श्रीमंत छत्रपती शिवाजी महाराजांच्या जयंतीनिमित्त किल्ले प्रतापगड शिवजयंतीचे औचित्य साधून चौथ्या महिला धोरणाची प्रत श्रीमंत छत्रपती शिवाजी महाराजांच्या चरणी अर्पण करून अखंड हिंदुस्थानचे आराध्य दैवत श्रीमंत छत्रपती शिवाजी महाराजांची जयंती किल्ल प्रतापगडवर मोठ्या उत्साहात साजरी करण्यात आली. सातारा जिल्हा परिषदेच्या वतीने महिला व बालकल्याण मंत्री अ‍ॅड. यशोमती ठाकूर यांच्या प्रमुख उपस्थितीत शिवजयंती उत्सवाचे आयोजन करण्यात आले होते. सुर्योदयाच्या साक्षीने मंगलमय वातावरणात सुरवात झालेल्या सोहळ्याने वातावरण भारुन गेले होते. ना. यशोमती ठाकूर व जिल्हा परिषदेचे अध्यक्ष यांच्या हस्ते भवानी मातेची महाअभिषेक तसेच यांच्या हस्ते भवानी मातेची मनोभावे महाआरती करण्यात आली.
भवानी मातेच्या मंदिरासमोर ध्वजस्तंभाचे मान्यवरांच्या हस्ते पूजन करून भगव्या ध्वजाचे रोहण करण्यात आले. यावेळी ढोल पथक लेझीम यांच्या गजराने परिसर दुमदुमून गेला. यावेळी प्रतापगड ग्रामस्थ व संयुक्त वनव्यवस्थापन समिती यांच्या संयुक्त विद्यमाने सर्व शिवभक्तांना अल्पोहाराची व्यवस्था करण्यात आली होती. मानाच्या पालखीची पूजा झाल्यानंतर छत्रपतींची मूर्ती असलेल्या पालखीचे वाजत गाजत मिरवणूक काढण्यात आली. काठीवर चालणारी मुले, आई भवानी मातेचा व शिवरायांचा जयजयकार करणार्‍या घोषणांनी मिरवणूक दुमदुमून गेली. अश्‍वारूढ पुतळ्याजवळ शिवरायांच्या पालखीचे आगमन झाल्यावर ना. यशोमती ठाकूर यांच्या हस्ते पुष्पअर्पण करून पूजन करण्यात आले. ’क्षत्रिय कुलावतंस राजाधिराज…. ’या ललकारीने अन् शिवरायांच्या जयजयकाराने प्रतापगडावर शिवकाळ अवतरल्याची प्रचिती आली. शिवपुतळ्यावरील ध्वजस्तंभावर मान्यवरांच्या हस्ते भगव्याचे ध्वजारोहण करण्यात आले. हा नयनरम्य सोहळा पाहण्यासाठी शिवभक्तांनी मोठ्या प्रमाणात गर्दी केली होती. ना. यशोमती ठाकूर यांनी शिवजयंतीचे औचित्य साधून चौथ्या महिला धोरणाचे प्रत श्रीमंत छत्रपती शिवाजी महाराजांच्या चरणी अर्पण केले.
बांबूच्या साह्याने सर केला किल्ले प्रतापगड
छत्रपती शिवाजी महाराजाच्या अतुलनीय पराक्रमाचा साक्षीदार असणार्‍या किल्ले प्रतापगडावर त्याचाच पायथ्याला असणार्‍या जावली प्राथमिक शाळेच्या लहान मावळ्यांनी बांबूच्या सहाय्यांनी गडस्वर केला
किल्ले प्रतापगडाच्या कुशीत विसावलेल्या जिल्हा परिषद प्राथमिक शाळा जावलीच्या या बालचिमुकल्यांनी बांबूच्या सहाय्याने गड सर केला. त्यांनी दोन्ही पायात काठी पकडुन त्याचा सहाय्यान जमिनीपासून सुमारे 4 ते 5 फुट उंच असून त्यांनी नृत्य सादर केले. हे अनोखे चितथरारक नृत्य पाहताना ना. डॉ. यशोमती ठाकूर यांनी आश्‍चर्य व्यक्त करत विद्यार्थी व शिक्षकांचे कौतुक केले. हे अनोखे नृत्य व चितथरारख कला कृती शिकवण्यासाठी मुख्याध्यापिका वैशाली कदम यांनी अथक परिश्रम घेतले. यावेळी प्रतापगड कुंभरोशीचे सरपंच कांचन सावंत, उपसरपंच ज्योती जंगम, किल्ले प्रतापगडचे ग्रामस्थ विलास मोरे, चंद्रकांत उतेकर, बबन कासुर्डे, कादर सय्यद, विजय कासुर्डे यांच्यासह मान्यवर उपस्थित होते.